Bi milioi euroko aurrekontua aurkeztu du udalak Irungo merkataritzari "bultzada eta erraztasunak" emateko. Finantzazio taula bat ere garatu dute.
Irungo Udalak merkatuei, hirigune komertzialei, merkataritza ez-sedentarioari eta merkaturatze kanalei babesa emateko laguntzak deituriko programara aurkeztu da. Diru laguntza bat jasotzea da asmoa, merkataritza sektoreko enpresei “bultzada eta erraztasunak” emateko.
Diru laguntza horrek bultzatu nahi dituen oinarriak dira, hala nola, enpresen eta administrazioaren arteko proiektuetan parte hartzea sustatzea; digitalizazio prozesuak sustatzea, teknologia berriak modu efizientean erabiltzeko prestakuntza pertsonalizatuaren bitartez; eta negozio ereduak berrikustea, garapen jasangarrirako helburuak lortzen laguntzearen ikuspegitik, “pandemia aurreko lehiakortasun mailak berreskuratzeko”.
Irunen hankak lur hartuta, laguntza horiek esleitzekotan Irungo Udalak dio “bertako merkataritzaren aldeko ekimen berriak sortu” nahi dituela, eta era berean, “hirian lehendik martxan zeudenak sendotu”. Esate baterako, Irun Market plataforma digitalari eutsi nahi diote.
Aldi berean, enpresen arteko lankidetza sustatu nahi du udalak, eta horretarako, “haien esku jarriko diren tresna eta eduki digitalentzako euskarri bat izateko”. Horrez gain, “CommerceLAB laborategi komertziala” martxan jarri nahi dutela aurreratu dute.
Aurkeztutako jarduketek 2 milioi eurotik gorako aurrekontua dute eta Europako funtsetako diru laguntzekin %80 finantzatu nahi du udalak. Eskema bat kaleratu dute diruaren banatzearekin:
- Eraldaketa digitalerako: 465.850,00 euro.
- Salmeta puntuaren eraldaketa: 1.282.465,31 euro.
- Jasangarritasuna eta ekonomia zirkularra: 125.878,91 euro.
- Hornikuntza katea eta trazabilitatea: 25.410,00 euro.
- Sentsibilizazioa eta prestakuntza: 76.230,00 euro
- Beste gastu batzuk, LCD totemak, merkatua, etab: 66.550,00 euro.
- Guztira: 2.042.384,23 euro.
- Diru laguntzaren %80a: 1.633.907,38 euro.
