Txingudi, play-offerako sailkatuta
Bilbon jokatutako partida galdu badute ere, lortutako bonus puntuekin sailkapena eskuratu dute bidasoarrek.
Zaisa Txingudik denboraldiko helburua lortu du asteburu honetan, play-offerako sailkatu da. Bilbon jokatutako partida galdu badu ere, lortutako bonus puntuek sailkapena eman diete bidasoarrei. Bigarren postuan bukatu dute denboraldia, eta ondorioz, play-offa jokatzeko eskubidea lortu du Txingudik.
Goiz jarri ziren asteburuko neurketan aurretik Txingudikoak, Ekain Hiribarrenek bihurtutako bi zigor kolperen bitartez. Plakaketetan fin ibili ziren Camarero eta Lasaren mutilak, baina lehen zatiko bukaeran indarrek behera egin zuten eta Nerbioik aldea murriztu zuen entsegu batekin (5-11). Bigarren zatian maila berean aritu ziren bi taldeak, markagailua 75. minutura arte ez zen mugitu, Nerbioi aurreratu arte. Azkenean ez ziren gai izan markagailua iraultzeko, eta garaipena Bilbon geratu zen.
Taldeko 14, 16 eta 18 urte azpikoen taldeentzako ere ez da asteburu onena izan. Gazteenek eskuratu dute garaipena soilik, Eibarren. 16 eta 18 urte azpikoek euren partidak galdu zituzten: 16 urte azpikoek porrot gorra jaso dute Elorrioren etxean (43-17) eta 18 azpikoek gutxigatik galdu dute Arrasaten.
