Bisitariak San Telmo gazteluaren erabilera pribatuaren kontra daude
Bisitarien %31k piraten gazteluaren memoriari eta haren garrantziari buruz ikasteko lekuaren alde dago; %28ak kulturarako eta arterako lekua izatea aukeratu du.
San Telmo gazteluan bisita antolatuak egiten dabiltza abenduaren 17tik eta guztira 1744 pertsona pasa dira martxoaren 19ra arteko datuen arabera. Horietatik %70 izan dira hondarribiarrak.
Bisita amaitzerakoan bisitariei galdetu diete gazteluaren etorkizunaren gainean, aurretik egindako planteamendu batzuen artean hautatzeko. Aukeren artean %31k piraten gazteluaren memoriari eta haren garrantziari buruz ikasteko lekua izatea nabarmendu du.
Bigarren aukera bozkatuena %28ren iritziarekin kulturarako eta arterako lekua izatea izan da, bai erakusketarako, dibulgazioarako bai ekoizpenerako.”Hondarribiarrek argi utzi dute ez dela ostalaritzarako edo bilera pribatuetarako gune bat bihurtu behar”.
Atzoko Udalerri Batzordean aurkeztu zituzten datu horiek eta gazteluaren hurrengo lanak zeintzuk diren jakinarazi zuten ere. Azterlan historiko bat egingo dute datozen hilabeteetan hainbat artxibo historikotan oinarrituta, gazteluari buruz dagoen informazioa eta dokumentazioa biltzeko. Txosten hori egiteko epea ez dute zehaztu, “ezagutzen diren emaitzen araberakoa izango baita”.
Ikerketa horrekin ere eraikuntza-egiturak aztertzeko azterketa arkitektoniko bat egingo dute; fotogrametria azterlan bat ere egingo dute, gazteluaren hiru dimentsioko irudikapen grafikorako, eta lurpearen azterketa arkeologiko bat.
