Osasun interpelazio bat egingo diote Gotzone Sagarduiri
David Soto euskal legebiltzarkideak interpelazio bat egingo dio Osasun sailburuari Bidasoa 2023-2033 ESIaren Gida Planari dagokiona.
David Nuño eta David Soto. David Soto Elkarrekin Podemos-IUko euskal legebiltzarkidea eta David Nuño udal taldeko bozeramailea Oinaurren bildu ziren atzo Gotzone Sagardui Eusko Jaurlaritzako Osasun sailburuari Irungo osasunaren inguruko interpelazio bat egiteko.
Sotok iragarri zuen interpelazio hori, Bidasoa 2023-2033 ESIaren Gida Planari dagokiona, Eusko Legebiltzarrean egingo den hurrengo kontrol bilkuran egingo diola: “Bidasoa ESIaren Plan Zuzentzaileari dagokionez, argi eta garbi adierazten da Irungo lehen mailako arretako zentroek zailtasun larriak dituztela herritarren egungo eskariari behar bezala erantzuteko, eta, era berean, ez dituztela behar diren ezaugarriak herritarren premietara egokitutako zerbitzu zorroa eskaintzeko”.
Egoera horren aurrean, legebiltzarkideak esan zuen Irungo erdialdean 10.000 metro koadro inguruko anbulatorio baten aldek “apustuari” eutsi diola Osakidetzak, Bidasoa Ospitalearen asistentzia zama arintzeko. Eta, “lurzoru nahikorik ez badago soilik” planteatzen duela “Oinaurreko anbulatorioa osagarri gisa”.
Legebiltzarkideak nabarmendu zuen asteartean Jose Antonio Santano alkateak adierazi zuela 2022an “aurrerapausoak” eman zirela Oinaurreko anbulatorioaren garapenean, eta informazio hori daukatela egindako topaketengatik eta komunikazioengatik: “Gure ustez funtsezkoa da jakitea zer aurrerapen mota zeuden proiektuan, eta, batez ere, Osakidetzak zergatik erabaki zuen hura geldiaraztea eta erabat desberdina eta epe laburrera eginezina den zerbait planteatzea”.
Sotok, gainera, baietsi zuen ez duela “koherentziarik” ikusten Irungo sozialisten jarreran, ez eta alkatearen adierazpenetan ere: “Otsailean, Osasun Bidasoa plataformak azaldutako beharrak planteatzen zituen ekimen baten aurrean, PSE-EEk aurka bozkatu zuen Eusko Legebiltzarrean. Alkateak eta Irungo sozialistek, zergatik eskatzen diote EAJri eskualdearen interesak defendatzeko, Gaintxurizketa igaro ondoren, hori egiteko gai ez badira? Koherentzia pixka bat eskatzen dugu”.
David Nuño Sotoren ildotik mintzatu zen, eta alkateari eskatu zion “Gasteizko kideak bultzatzea, EAJ egiten ari den joko bera egiten ez jarraitzeko”. “Eskualdean argi ikusten genuen egoera ez zela egokia, eta soluzioak bilatzeko lan egin dugu. Eskatu nahi dut alkateak Osasun Bidasoa plataformaren proposamenen alde duen jarrera bizi hori Gaintxurizketatik kanpo ere eskatzea”, gaineratu du bozeramaileak.
