Aste Santuan, GazteTEK tailer teknologikoak
Tailer hauen bidez 8-13 urte bitarteko haurren "asmamena sustatu" nahi dute, eta bide batez, "teknologia berrietara hurbilarazi, hainbat gai dituzten lantegien bidez".
Aste Santu honetan ere GazteTEK tailer teknologikoez gozatzeko aukera izango dute 8 urtetik 13 urtera bitarteko haurrek, udalaren eta Bidasoa Biziriken egitasmoz. Oporraldian izango dira tailer horiek, apirilaren 3tik 5era eta 11tik 14ra bitarte. Udaleko iturrien arabera, “jarduera teknologiko dinamiko, sortzaile eta berritzaileen bidez haien ingenioa sustatzea” dute helburu tailerrek.
Tailer hauen bidez “haien asmamena sustatu” nahi dute, eta bide batez, “teknologia berrietara hurbilarazi, hainbat gai dituzten lantegien bidez”. Programazioa, bideojokoen diseinua eta sorkuntza, robotika eta 3D inprimaketan ariko dira. Jarduera guztiak praktikoak izango direla aurreratu dute, eta “tresna erraz eta intuitiboak” erabiliko dituztela.
Adinaren arabera banatuko dituzte haurrak. Batetik, 8-10 urte bitartekoek Gora Airea! izeneko tailerra emango dute apirilaren 3tik 5era. Hainbat robot eta mekanismo diseinatzea, muntatzea eta programatzea du helburu honek, taldean egingo dituzte. Apirilaren 11tik 14ra berriz, Eraikin Adimendua izenekoa eskainiko diete. Talde bakoitzak eraikinaren edo dorre adimentsu eta bioklimatikoaren solairu bat egingo dute, Lego eta bestelako piezak erabiliz.
11 urtetik 14 urte bitartekoek aldiz, beste bi tailer emango dituzte. Lehenik, Berotegi automatikoa eta lorategi botanikoa izenekoa egingo dute apirilaren 3tik 5era bitarte. CyberPi Go Kit mikroordenagailua erabiliz lorategi botaniko bat eta barruko berotegi bat diseinatuko dute. Bigarrenik, apirilaren 11tik 14ra hain zuzen, bela patin bat diseinatu, muntatu eta programatuko dute haurrek, eta aginte bat eraiki eta programatuko dute, Bluetooth bidez patinarekin komunikatuko dena.
Tailer bakoitzean hamar lagun onartuko dituzte. Itsas Etxea Auditoriumean izango dira tailer guztiak, 9:30etik 13:30era. Doakoak izango direla aurreratu dute, baina izena eman beharko dela (hilaren 12a baino lehen).
