Garaipena oso gertu izan du Txingudi Errugbik
Gaztedi nagusitu zen azkenean etxeko zelaian, 22-26 zenbatu zuen markagailuak.
Argazkia: Txingudi Errugbi Taldea. Porrot honekin, Zaisa Txingudik bigarren postuan jarraitzen du baina orain puntu bakar bateko aldea du Gaztedi Brekiko. Martxoaren 18an Plaiaundin Zarautz B-Beltzaken aurka jokatuko den partida final bat izango da.
Emakumeen taldea
Mugarria izan da asteburu hau Txingudi Zaisako emakumeentzat. Maider Aizpurua eta Asun Gamindezen neskek Mungiaren aurka izugarrizko partida jokatu zuten.
Azken asteetan gehitu diren jokalari berrien ekarpenak taldea sendotzea eragin du. Txingudi Errugbi Taldea itxaropentsu dago talde honen etorkizunarekin, entrenamenduetan ere fin dabilelako taldea.
Norgehiagokan zehar, prestatzaileek gauza ezberdinak probatzeko aukerak izan zituzten, bizkaitarrek hiru laurdenetan zuten nagusitasuna indargabetzeko asmoz. Honela, Maier Aia, melearen zortzian partida hasi zuena, joko zabaltzaile lanetan ere ibili behar izan zen eta Lupe Pescadorren lesioak lerroketaren konfigurazioa berriz aldatzera behartu zuen.
Hamabostekoa osatu bazuten ere, hainbat kide faltan bota zituzten, hala nola, Irati Lazkano eta Claudia Barbero, lesionaturik, taldearen laguntzaile lanak egin zituen azken honek, Ainara eta Iraide Varela, gaixorik, eta Helene Tristan.
Sub 14
Hain zuzen ere, Helene Tristan Hernanin garaipena lortu zuen taldearen parte izan zen larunbatean. Bidasoarrek ez zieten aukerarik eman hernaniarrei eta behin eta berriz hautsi zuten haien defentsa. Garaipen honek ligako goiko postuetara hurbiltzeko balio izan dio Txingudik eta Baztanek osatutako taldeari.
Eki Fanlo, munduko serieetan berriz ere
Pasa den asteburuan, Eki Fanlo, nazioarteko errugbi epaile irundarrak bere ibilbidean beste pausu handia eman du Munduko Zazpiko errugbiko serieen Kanadako txapelketako lau partida epaituz. Taldeak epailearen lana zoriondu du eta arrakasta izaten segi dezan opa dio.
Australia eta Japonia, Fiji eta Kolonbia, Britania Handia eta Kolonbia eta Brasil eta Kolonbiaren emakumezkoen selekzioen partidak izan dira Fanlok epaitutakoak.
