'Gipuzkoa Martxan' egitasmoa Zabaltza plazan izango da asteburuan
Oinezkoen erabilerarekin lotutako mugikortasun aktiboa sustatzen du kanpainak. Egitarau zabala antolatu dute astebururako.
Zabaltza plaza. Gipuzkoako Foru Aldundiko Mugikortasuneko eta Lurralde Antolaketako Departamentuak ‘Gipuzkoa martxan’ egitasmoa abiatu du “oinezkoen erabilerarekin lotutako mugikortasun aktiboa sustatzeko, bai bidegorrietan baita hirietako ibilbideetan”. Larunbatean Irunera iritsiko da, eta igande eguerdira arte izango dira hirian.
Asteburuan karpa bat jarriko da Zabaltza plazan. Bertan, programatutako jarduerei buruzko informazio zehatza aurkitzeaz gain, Irundik hurbil dauden bide berdeei buruzko informazioa helaraziko dutela jakinarazi dute.
Egitarauari dagokionez, programazio zabala dakarte. Larunbatean eta igandean, 10:30ean, ginkana bat egingo da, eta txikienek, puzgarriak eta pedalei eragiteko pistak ere izango dituzte. Larunbatean, mugikortasun aktiboa sustatzeko jardueren barruan, ibilketa nordiko bat egingo da, 11:00etan. 10:30ean, jarraibideak eman eta parte hartzeko materiala banatuko dute martxan ateratzeko.
12:00etan, ‘Oiasso erromatarretik Irunerako kultura pasealekua plazatik plazara’ ibilaldia egingo da Irungo kaleetatik, “inguruko kultura ondarea jarduera osasungarri baten bidez ikusteko”.
Igandean, berriz, 11:00etan, beste ibilaldi bat egingo da: ‘Ezagutu Bidasoa eta bere historia’. Bi orduko iraupena izango du.
