[Argazki galeria] Etxeko uretan, Hondarribia garaile
Larunbat arratsaldean egin zen Hondarribiko XXIII. Traineru jaitsiera. 40 traineruk hartu zuten parte.
Hondarribia A ontzia, arraunak gora. Larunbatean arratsaldeko 16:00etan eman zioten hasiera Hondarribiko XXIII. Traineru jaitsierari. Hondarribia Arraun Elkarteko hiru traineruek emaitza txukunak bildu zituzten eta kai muturrera bertaratu ziren zaletuek oihu eta txalo zaparradarekin animatu zituzten.
Aurreko egunetan iragartzen zutena baino itsaso gutxiago izan zuten arraunlariek. Hala ere, itsasoa zakar zebilen kanpokaldean. 1,5 metroko olatuak eta ipar haizea izan zituzten lagun.
Zaletu ugari gerturatu ziren Hondarribiko kai muturrera euren taldeak animatzera. Hasieran 42 traineruk izena eman bazuten ere, azkenean, 40 ontzik heldu zioten estatxari. Hurrengo hitzordua martxoaren 11an izango dute Orion, Oriaren XXIX. Traineru Jaitsieran, 17:00etatik aurrera.
Emaitzak
Beteranoek bi itsas mila burutu zituzten. Irabazlea Fortuna ontzia izan zen 14:51,80ko denborarekin. Bigarren Badok 13 (14:58,48) eta hirugarren Mundaka (15:13,15).
Emakumeen kategorian Donostiarrak irabazi zuen Hondarribiko jaitsiera (14:39,00). Bigarren Orio (14:59,12) eta hirugarren Arraun Lagunak (15:00,30).
Gizonezkoetan, berriz, etxeko traineruak eraman zuen garaipena. 19:56,30an gelditu zuen kronometroa Hondarribia A ontziak. Bigarren Donostiarra A izan zen (20:07,27) eta hirugarren Orio A (20:15,55). Ikus jardunaldiko denborak.
Hona hemen jaitsierako zenbait argazki (Argazkiak: Josu Z):
