Bera, baldintzapean aske, 22 urteren ondoren
Francisco Jose Ramada Estevez 'Bera' presoari baldintzapeko askatasuna onartu diote, Etxerat-ek jakinarazi duenez. 22 urte eman ditu espetxean.
Bera ospitaleratu zutenean egindako elkarretaratzea, iaz. Etxerat-ek jakinarazi duenez, Francisco Jose Ramada Bera presoa baldintzapean aske geratuko da. Iazko otsailetik hirugarren graduan zegoen, eta baldintzapeko askatasuna onartu diote.
Berak 59 urte ditu, eta horietako 22 urte eman ditu espetxean. Azken urteetan osasun aldetik larri ibili da irundarra. Izan ere, iazko urtarrilean arnasik gabe geratu zen Martuteneko espetxeko patioan, eta erietxera eraman behar izan zuten, bihotzeko arazoak zituela eta. Ondoren hirugarren gradua aplikatu zioten.
Lehenago ere, Murtzian, bihotzetik ebakuntza egin zioten. Ordu hartan Etxerat-ek salatu zuenez, behar baino lehenago eraman zuten ospitaletik espetxera.
Sortuk preso “bat gutxiago” geratzen dela gogorarazi du, eta une honetan kartzeletan 168 euskal preso geratzen direla.
