Oinaurreko erietxearen irudi bat zabaldu du Irungo Udalak
Anbulatorioaren argazkiak eta Osasun Sailaren parametroek bat egiten dutela adierazi du Irungo Udalak. Bestetik, Irunerako osasun plan integral bat galdegin du berriz alkateak.
Irungo Udalak Oinaurren eraikiko duten erietxearen argazki bat jaso duela jakinarazi du. Xehetasun askorik gabeko irudia dela azaldu du udalak, baina Osasun Sailak emandako parametroekin bat egiten dutela diote.
Berriz defendatu du udal gobernuak Oinaurre dela aukerarik onena eta azkarrena hirugarren anbulatorio batentzat, tartean, 10.000 metro koadroko lursaila dagoelako erreserbatuta auzo horretan.
Gainera, Irungo udalbatza osatzen dutenen gehiengoaren babes politikoa duela proposamenak azpimarratu dute, hau da, PSE-EE-rena, Elkarreki Podemosena- Ezker Anitzarena, Irungo EH Bildurena eta PP-rena.
Bestalde, Jose Antonio Santano alkateak eskaera egin zion Eusko Jaurlaritzari Irungo osasun baliabideen plan integral bat eskatuz, eta gaur salatu du oraindik ez dutela hori jaso. “Diseinuaren bidez, berriro ere, jarduketaren premia eta urgentzia adierazi nahi du Udalak”.
Udalak txosten bat helarazi zion Osasun Sailari Lapitzeko anbulatorioa handitu daitekeela erakusten zuena: “Zehazki, Hirigintza Arloak egindako txostenaren arabera, Erdialdeko anbulatorioaren egungo azalera eraikia 2.089 m2 da, baina partzela aztertu, eta ikusi da 1.560 m2 inguru handitu daitekeela eta guztira 3.649 m2 izan daitekeela”.
