Tximeleta begizta janzteko gala Irungo kirolarientzat
Irungo kirol klubek eta kirolariek topaketa eta omenaldia egitea du asmo kirolaren galak. Irun "hiri olinpikoa" dela nabarmendu zuen kirol zinegotziak.
Aitzpea Gonzalez, Irundarron saria jaso zuen unean. Kirolaren Gala egin zuten atzo Ficoban. Topaketa bat da, kirolari eta kluben artekoa, eta udalak haien lana eskertzeko baliatzen du. Horregatik, Borja Olazabal, Kirol zinegotzia eta Jose Antonio Santano izan ziren bertan.
Ekitaldian Olazabalek hitza hartu zuen eta eskerrak emateko probestu zuen: “Irun hiri olinpikoa izan zela esan dezakegu. Eta ez da esajeratzea; izan ere, kirolariak dauzkagu diziplina ugaritan, eta ohikoa da irundarren batek joko olinpikoetan parte hartzea, gogoan izan zenbat eman diguten piraguismoak edo eskubaloiak, besteak beste”.
Sariak jasotzeko sailkatuen berri duela hilabete bat eman zuten, eta herritarren bozka egin zezaketen. Bada, atzokoa sari horiek banatzeko eguna izan zen:
- Emakumezko kirolari onenaren saria: Irati Beorlegi. OCR oztopo lasterketen Espainiako txapelduna izan da.
- Gizonezko kirolari onenaren saria: Ander Montserrat, Unai Sagarzazu eta Sebas Martinez. Trinketeko munduko txapelketako zilarrezko dominaren irabazleak.
-
Klubik onenaren kategoria: Irunes txirrindularitza elkartea eta Bidasoa Atletiko Taldea. Kirola sustatzeko egiten duten lanagatik eta iaz hiriko lehen duatloia antolatzeko egin zuten lan bateratua saritzeko.
- Irundarron saria: Aitzpea Gonzalez eta Naroa Zubimendi. Espainiako txapeldunak izan ziren distantzia luzeko binakako eta lemazainik gabeko kategorian.
- Txokolatezko baloia: Leontxo Garcia. Mundu mailako erreferentea izateagatik xakearen dibulgazioan.
Bestelako omenaldientzako tartea ere egin zuten. Esaterako, Eki Fanlo omendu zuten, meritu ugari bildu dituelako errugbiko nazioarteko epaile gisa, eta 2022an munduko txapelketan parte hartzera gonbidatu zuten.
Harrobiek ere aitortza berezia jaso zuten eta Leka Enea Mahai Tenisaren txanda izan zen orduan. Talde horrez gain, kirol egokitua sustatzeagatik ere omenaldi berezia jaso zuten Futboleko CD San Martzial eta Txingudi Eskubaloiak.
Gala ixtearen ardura alkatearena izan zen, “Irun bere kirolariez oso harra dago”. Aipamen berezi bat ere egin zion Ander Elosegiri, aste honetan jakinarazi baitzuen erretiroa hartuko zuela goi mailako lehietan. Nabarmentzekoa da Elosegik, gainera, lau joko olinpikotan parte hartu duela, eta Santiagotarrak taldeko harrobiko izarretako bat dela.
