Abotsanitzen Herri Batzarrak hautagaien zerrenda onartu du
Maiatzeko udal haueskundeetan, Igor Enparan izango da Abotsanitzen alkategaia. Adin aniztasuna eta parekidetasuna izan dituzte ardatz zerrenda osatzerako garaian.
Atzo, osteguna, maiatzeko udal hauteskundeen inguruko gaiak jorratzeko herri batzarra egin zuen Abotsanitzek. Hala, orain arteko ibilbideaz, herriko eragileekin izandako harremanaz, edota programa politikoaz jarduteaz gain, zerrendako lehen sei hautagaiak ezagutarazi zituen.
Alderdia sortu zenetik zortzi urte igaro dira honezkero, eta Abotsanitzeko kideek urte guzti hauetan herriko banako eta eragileekin harreman estua izateko aukera izan dutela azpimarratu dute. Horrek, herriko behar eta erronkak identifikatzeko aukera eman diela gaineratu dute ere.
Haien arabera, zerrenda osatzerako garaian, hainbat aldagai hartu dituzte kontutan: parekidetasuna, herri eragile eta auzo elkarteetako ordezkaritza eta adin aniztasuna bermatzea izan dira horiek. Hortaz gain, aurrera begira udalean egin beharko den lana aintzat hartu dutela azaldu dute, eta zentzu horretan osatu duten zerrendak udaleko dinamika politikoan eta administrazioan esperientzia duela diote.
Honenbestez, hauek dira aurtengo udal hauteskundeetarako Abotsanitzen lehen sei hautagaiak (zerrenda osoa aurrerago egingo dute publiko):
1. Igor Enparan Araneta.
2. Estitxu Urtizberea Sorzabal.
3. Lupe Queiruga Oronoz.
4. Aitzol Arroyo Tumas.
5. Josu Peña Alza.
6. Tamara Sastre Castillo.
