Plan handi bat Katea auzoarentzat
Elizatxo hiribidea berrurbanizatzeko proiektua idazteko kontratazioa onetsi du Irungo Udaleko Tokiko Gobernu Batzarrak.
Gaur goizean Irungo Udaleko Tokiko Gobernu Batzarra bildu da, eta zenbait erabaki komunikatu dituzte. Horietako bat Elizatxo hiribidea berrurbanizatzeko proiektua idazteko kontratazioa onestea izan da. 193.600 euroko aurrekontua izango dutela jakinarazi dute.
Jarduketa hori Letxunborro hiribidearen eta Porcelanaseko biribilgunearen artean gauzatuko da.
ADIFen eta Euskotrenen trenbideek bi zatitan banatzen dute Katea auzoa. Iparraldean, Aranibar bizitegi gunea dago, eta, hegoaldean, Andrearriaga ibilbidetik beherako biztanle gunea.
Udalak azaldu du Elizatxo ibilbideko biaduktuaren eta trenbideen ondorioak nabari dituela auzoak, Andrearriaga ibilbidearekiko paralelo bukatzen baita Elizatxo hiribidea, auzoa zatituz. Oinezkoentzako zeharkako loturak ere txikiak direla eta degradatuta daudela nabarmendu dute: auzoaren bi aldeak Teileria kaleko pasabidearen eta Molino errepidearen bidez bakarrik lot daitezke oinez.
Hirugarren haria eraikitzeko, Elizatxo hiribideko bideen gaineko zubiaren galiboa handitu behar du ADIFek, eta horretarako, egungo zubia desmuntatu eta berri bat eraikiko duela zehaztu du udalak. Era berean, Euskotren azterlan bat egiten ari dela aurreratu dute, bere linea hirian integratu eta ADIFen gainerako azpiegiturekin lotzeko.
Irungo Udalak aldaketa hori baliatuko duela adierazi du, eta aipatutako bide ardatza Kateatik Plaiaundirainoko ardatz berri baten abiapuntua izateko moduan eraldatzeko aukera ikusi duela jakinarazi du. Letxunborro hiribidetik Porcelanaseko biribilgunerainoko bide ardatza berrurbanizatzeko, bide egitura aldatu beharko dela esan du udalak, eta horrek Letxunborro hiribidea hiria egituratzen duen bide ardatz berria bihurtzea ekarriko du.
ADIFek aurreikusten duen pasarela arina izango dela azaldu dute, eta egungo hormek ematen duten lubaki sentsazioa desagerraraziko du. Proiektuak honako lanak zehaztu beharko ditu:
- Andrearriaga ibilbidetik ADIF eraikitzekoa den pasarela berrirainoko biaduktu zatia kentzea eta pasabidea berri arin bat eraikitzea, azpitik pasatzeko eta azpian lokal batzuk jartzeko aukera ematen duena (proiektuak berak zehaztu beharko ditu lokalak).
- Elizatxo hiribidea berrurbanizatzea, Letxunborroko biribilgunetik Porcelanaseko biribilguneraino, oinezko eta txirrindulariek erabil dezaten bultzatzeko.
- Andrearriaga ibilbidearen ondoko eta pasarelaren azpiko eremua berrurbanizatzea, trenbideen ondoan parke bat sortuta eta egungo eraikinak eraisteko aukera kontuan hartuta.
- Saneamendu sarea eta edateko ura hornitzeko sarea berritu eta konpondu beharrik dagoen aztertzea; argiteria berria jartzea, jasangarritasun irizpideei eta energia aurrezteko irizpideei jarraikiz; eta gainontzeko azpiegiturak mantendu, berritu edo handitu beharra dagoen aztertzea.
