Partida garrantzitsua igoeraren lehian
Txingudiko gizonen senior taldeak neurketa garrantzitsua du larunbatean. Iñigo Camarerok argi utzi du igoera zuzena lortu nahi badute, geratzen zaizkien bost partidak "nahi eta nahi ez" irabazi behar dituztela.
Argazkiak: Beñat Herrero. Txingudi eta Arratikoren arteko joaneko partida. Txingudi Errugbi Taldeko gizonen senior taldea lehiara itzuliko da larunbatean. Igorren jokatuko dute, Arratiko Zekorrak taldearen aurka, 16:00etan, San Txisme zelaian. Arratiko Zekorrek aurtengo denboraldian erakutsi dute “ezustekoak” emateko gai den taldea dela; izan ere, joaneko partidan, igorretarrak Plaiaundin nagusitu eta puntuak etxera eraman zituzten. Etziko partida, baina, buru-belarri prestatu dute bidasoarrek, eta jokalariek presio egoeretan erabakiak hartu eta jokoa moldatzeko baliabideak landu dituzte astean zehar.
Txingudik Oihan Arruabarrena, Iker Tejero eta Xabi Sanchez jokalarien hutsunea izango du Igorren, eta ‘Gabo’ Lizarazu, Sua Varela, Ramon Bergua, Urko Genua, Asier Amigo eta Asier Gonzalezen parte hartzea airean dago oraindik. Horrez gain, Txingudik urteak daramatza Igorren irabazi gabe, eta San Txismen jokatutako azken neurketan, etxekoek garaipen sendoa lortu zuten (46-10).
Txingudi sailkapeneko bigarren postuan da, eta Iñigo Camarero prestatzaileak argi du igoera zuzena lortu nahi badute, geratzen zaizkien bost partidak “nahi eta nahi ez” irabazi behar dituztela. Horretarako lehen aukera etzi izango dute.
14 urtez azpikoak, Lasarten
Senior gizonez gain, 14 urtez azpiko taldea izango da asteburuan zelairatuko den bakarra. Lasarten arituko dira, Zarautz-Beltzak taldearen aurka, igandean. Peiko Pardo eta Koldo Alonso entrenatzaileek adierazi dute ligako taldeen maila “oso parekatua” dela, eta horrek neska-mutil errugbilariei “gozatzeko aukera” ematen diela.
