Bidasoa ibilbidea itxita egongo da astelehen goizean zehar
Sabino Arana kaletik nahitaez Axular kalera egin beharko da. Bestalde, Arrantzale auzoa eta Santiago kalea berritzeko planak aurrera doaz.
Bidasoa ibilbidea ezingo dute ibilgailuek erabili astelehen goizean zehar. 
Hirigintza eta trafiko arloei loturiko zenbait informazio eman berri du Hondarribiko Udalak. Batetik, Bidasoa kalea itxita egongo da astelehen goizean, eta bestetik, Arrantzale Auzoa eta Santiago kalea berritzeko proiektuaren idazketa esleitu berri du.
Lehen eta hurbilekoenari dagokionez, Kalez Kale Hondarribia hobetzen lan programaren ondorioz, Bidasoa ibilbidea itxita egongo da astelehen goizean, zehazki, 09:00etatik 13:00etara. Bitarte horretan, Sabino Arana kaletik nahitaez Axular kalera egin beharko dela jakinarazi du Udaltzaingoak.
Arrantzale auzoa eta Santiago kalea
Bestalde, hiri erdiguneko Arrantzale auzoa eta Santiago kalearen lehen zatia —1 zenbakitik 21era— berriritartzeko proiektua idatzi eta geroko obrak zuzentzeko lanak adjudikatu berri ditu udalak.
Arrantzale auzoko obren proiektuaren idazketa eta horien zuzendaritza Endara enpresari esleitu diote, 72.300 euroko —gehi BEZa— aurrekontuarekin, eta 32 hilabeteko epearekin. Era berean, Santiago kalea berrurbanizatzeko proiektua idatzi eta geroko obrak zuzentzeko lehiaketa enpresa berak irabazi du, eta horretarako 24.700 euroko — gehi BEZa— eta 11 hilabeteko epea izango du.
Udalaren asmoa da espaloiak handitzea eta lurpean dauden kanalizazioen bereizketa egitea, Portuko gainontzeko kaleetan egin den moduan. Espaloiak zabalagoak izango dira, beraz, eta kale guztia altuera berean egongo da; Santiago kalearen bigarren zatian eta San Pedro kalean, “egindakoari jarraipena ematea” da udalaren helburua. Dena den, lanak hasi aurretik, arduradunek bizilagunekin bilera egingo dutela ziurtatu dute.
