Emakundek behin betiko V. Berdintasun Plana eskatu dio alkateari
Bi plan ezberdin jaso ditu Emakundek: Berdintasun arloak bidalitakoa eta alkateak bidalitakoa. Elkarrekin-Podemosek Emakunderen erantzuna ezkutatzea salatu du.
2022ko alardeko argazki bat. V. Berdintasun Planaren gainean gatazka piztu zen Irungo Udalean abenduan. Izan ere, Miren Etxebeste Berdintasun zinegotziak alkateari leporatu zion alardearen bueltakoak jorratzen ez duen plana idazteko agindua eman izana udal teknikariei.
Ordurako V. Berdintasun Plana idatzita zegoela jakinarazi zuen ordezkariak. Bestetik, teknikoen eta gizarte eragile ezberdinekin osatutako mahai kideen inolako kontrasterik gabeko plana da Jose Antonio Santanok, EAJ eta PP-ren babesarekin idaztera agindu zuena, beraz.
Etxebestek abenduko agerraldian argi utzi zuen zinegotziak kudeatutako plana izan zela Emakundera bidali zuena, eta salatu dute Santanok dokumentu horren berri ez ziela udal talde politikoei jakinarazi.
Aldiz, Irungo Udalak bi egun geroago “udaleko gehiengo politikoaren babesa eta herritarrek parte hartzeko prozesuan egindako ekarpenak” dituen plana bidali zuela adierazi zuen 2022ko abenduaren 16an.
Emakunderen erantzuna 2022ko abenduaren 30ean iritsi zen eta izen berdineko bi dokumentu jaso zituela ohartarazi zioten alkateari. Egoera horren aurrean behin betiko dokumentua bidaltzeko eskaera egin dio Emakundek Santanori, txostena egin ahal izateko.
Elkarrekin-Podemosek salatu du Emakunderen erantzuna partekatzeari uko egin diola alkatetzat, “nahiz eta eskatu”, eta Emakundek zuzenean Berdintasun Ordezkariari bidali zion.
