Jabier Muguruzaren 'Dodoa' podcasta, EITBn
Proiektua estreinatu berri da EITB Podcast atarian, eta sei atalez osatua dago. Euskara eta musika uztartzen ditu.
EITB Podcast atariak haurrei zuzendutako ‘Dodoa’ podcast berria estreinatu berri du, sei atalez osatua dagoena eta euskara eta musika uztartzen dituena. ‘Dodoa’ Iñigo Astiz kazetari eta poetaren letrak eta Jabier Muguruza irundarraren musika uztartuta 2021ean sortutako abestien bilduma da.
Mikel Azpiroz musikaria ere batu da proiektura bere pianoarekin eta soinu-teknikari lanarekin. Azaldu dutenaren arabera, proiektuaren helburua nagusia da kantuaren eta entzumenaren bitartez irudimena lantzea, musika zaletasuna piztearekin batera. Kantuetan, Muguruzarekin batera, Nieves Arilla aritu da.
