Eraikin eta kaleen arteko irisgarritasuna hobetzeko laguntzak daudela oroitu du udalak
Loiolako Enekoren karrikan dago batez ere igogailuak jartzeko beharra, eta komunitate batzuk erabili dute jada horretarako udalak sortutako diru laguntzak.
Joan den astean Larreaundi auzoko Loiolako Enekoren karrikako 1, 3, 5 eta 7 zenbakien atarietara iristeko igogailua jartzeko lizentzia eman zuen Irungo Udalak. Kale horretan sei patio daude guztira kaletik atarietara irisgarritasun falta dutenak.
Bizilagunek 2018an udalak martxan jarritako irisgarritasuna hobetzeko laguntza programa baliatu dute igogailuaren proiektua idazteko. Lehen instalazioko obrak finantzatzea eskatu zuten, orotara, 4.198,70 euro jaso dituzte proiektua idazteko. Orain, proiektua gauzatzeko laguntzak ere eskatu dituzte.
Miguel Angel Paez Hirigintzako ordezkariak azaldu du udal diru laguntza hauei esker arazoari konponbide praktikoena ematen ari direla igogailuak instalatzeko asmoa duten komunitateei.
Irisgarritasuna hobetzeko laguntzak
2018an sortu zuen udalak diru laguntza hau, bide publikoaren eta eraikin multzo bakoitzaren atariei sarbide ematen dieten espazio edo plataforma pribatuen arteko irisgarritasuna hobetzen zuten proiektu eta ekimenak diruarekin laguntzeko asmoarekin. Era horretan, irisgarritasun arauak beteko zirela azaldu du Paezek.
Irisgarritasuna hobetze horretan igogailuak instalatzeak balio du, baita komunikazioko azpiegiturak konpontzea ere. 2019ra bueltatuz, udalak laguntzak eman zizkien jabeak diren komunitateen bost elkarteri, igogailuen proiektuak idazteko eta bizilagun komunitate horiek guztiak Loiolako Enekoren karrikan daude.
Igogailuaren proiektua idazteko edota obra bera gauzatzeko eska daitezke laguntzak. Diru laguntza horien muga 100.000 euro edo diruz lagun daitekeen aurrekontuaren kostuaren %60a da.
