San Migel konpainiak jaialditxo bat antolatu du larunbat honetarako
Taldea indartu nahi dute eta auzotarrei horretarako deia egiteko modua da jaialdia. Autofinantzaketaren lehen urratsa izango da ere.
San Migel konpainiaren egungo argazkia San Migel konpainia sortu nahi dutela jakinarazi zuen auzotar talde batek urria bukaeran eta horretan lanean dabiltza buru-belarri. Gainera, ez dabiltza soilik 2023ko ekainaren 30era begira jardunean, horren seinale da larunbat honetako goizerako Antzaran plazan antolatu duten jaialditxoa.
Taldea indartu nahi dute, kide gehiago batzea, alegia. Helburu hori lortzeko ikusgarritasunean jarri dute fokua eta jaialdia horretarako baliatuko dute. Hartara, haurrentzako jolasak prestatuko dituzte eta mokaduren bat jateko aukera ere izango da.
Horrez gain, autofinantzatutako taldea izan nahi dutela adierazi du konpainiako kide den Alejandra Pascualek. Ez dute hastapenetan konpainiako kide batzuek jarritako diru laguntzarekin aurrera egin ahalak egingo dituen konpainia izan nahi.
Beraz, eskopetak edota konpainiaren txapak erosteko parada izango da. Bizkotxo eta tortilla salmentekin ere sosa batzuk lortzeko intentzioa adierazi dute. Xehetasun guztiak konpainiaren Facebook eta Instagram kontuetan igoko dituzte.
