Irungo elkarteek boluntario gehiago behar dituzte
Boluntarioak erakartzeko kanpaina bat hasi du gaur Irungo Udalak, gizarte zerbitzuen behar areagotuari erantzun ahal izateko.
Boluntariotza sustatzeko kanpaina baten berri eman du gaur David Nuño Gizarte Ongizateko ordezkariak Irungo Udalean izan den agerraldian. Gizarte zerbitzuen eskaerei jaramon egiten dieten elkarteei bultzada ematea dute asmo Zure denboraren balioa-rekin.
Hirugarren sektore sozialaren gaineko azterlan bat egin dute elkarteekin harremanetan eta haien gomendioak jarraiki osatutako komunikazio kanpaina da prestatutakoa. Txosten horretan jaso dute boluntario gehiago behar direla gizarte zerbitzuen eskariak izan duen gorakadari aurre egiteko eta horretan zentratuko du fokua kanpainak.
Irunen 1.000 boluntario baino gehiago dabiltza gizarte sektorean eta 60 bat erakunde dira. Gizarte lanetan dabiltzan elkarte horiek lan ezberdinak egiten dituzte, esaterako, gizarteratzea, lankidetza, bakardadeari aurre egitea… Zerrenda honetan jaso dituzte elkarte guzti horien helburuak eta harremanetarako moduak.
Euskarri hau QR baten bidez eta beste komunikazio kanpainei esker jaso ahalko da ere, euskaraz zein gazteleraz. Irratian kanpainak egingo dituzte eta sare sozialetan eragin. Abenduaren 12tik 23ra bitarteko iraupena izango du kanpainak.
