Ezohiko asteburua Zaisa Txingudirentzat
Gizonen talde nagusiaren aurkariak ez ziren partidara aurkeztu, eta 16 eta 18 urtez azpiko taldeek porrot nabarmenak izan zituzten.
Argazkia (Jordi Blasi): 16 urtez azpikoen taldea meléa Getxoren aurkako partidan. Ezohiko asteburua izan zuen Zaisa Txingudik, batez ere gizonen talde nagusiak, bere aurkaria zen Nerbioi-UBR taldea ez baitzen partidara aurkeztu. Aurkariak ez ziren Plaiaundira bertaratu jokalari nahikoa ez zituztelako neurketa jokatzeko. Bidasoarrek kirol diziplina batzordearen ebazpena itxoin beharko dute sailkapenean horrek izango duen eragina ikusi ahal izateko.
Gazteen taldeei dagokionez, ez zen asteburu oparoa izan 16 eta 18 urtez azpiko taldeentzat, biek galdu baitzituzten euren norgehiagokak. 16 urtez azpikoek Logroñon jokatu zuten Rioja taldearen aurka. Alde nabarmenarengatik galdu zuten bidasoarrek (69-5), eta soilik azken minutuetan lortutako entseguari esker lortu zuten markagailuan puntuak gehitzea.
Bestalde, 18 urtez azpikoek ere ez zuten aukerarik izan Lasarten, eta alde nabarmenarengatik galdu zuten (62-0). Aurkari izan zuten Zarautz-Beltzak taldeak ez zien aukerarik eman, eta nagusitasunez menderatu zituzten bidasoarrak.
