Teknika japoniarra ezagutu ahal izango da Zeramika Tailerrean, egun osoko ikastaroan. Izen-emateak hilaren 15ean itxiko dira.
Hilaren 16an, 10:00etatik 18:00etara, Zeramika Tailerrean, ‘Raku’ teknika ezagutarazteko ikastaro bat egingo da. Teknika hori Japonian sortu zen XVI. mendean, eta tearen zeremoniarako ontziak esmaltatzean datza. Tailer horretan katiluak esmaltatzeko formulak prestatuko dira, ‘chawan’ izenekoak, eta ikastaroko antolatzaileek emango dituzte ontzi horiek.
Tailerrak bi zati izango ditu. Lehenengoan esmalteak prestatuko dira, formulako osagai guztiak pisatuta, eta ondoren, esmalte hori piezari aplikatuko zaio. Bigarren zatian, aldiz, pieza labean erreko da, eta parte hartzaile bakoitzak bere etxera eramango du ikastaroa bukatzean.
Udalak azaldu du parte hartzeko ez dela beharrezkoa aurretiko esperientzia izatea zeramika modelatzen edo esmaltatzen. Izen-emateak hilaren 15ean itxiko dira, eta Irungo Udaleko egoitza elektronikoaren bitartez egin behar dira. Ikastaroak 40,80 euroko prezioa du. Informazio gehiagorako, interesdunek 617 47 90 21 telefonora deitu beharko dute.
Bidasoari buruzko kalitatezko informazioa eta gertukoa jaso nahi dudalako. Euskaraz bizi nahi dudalako eta hizkuntzaren biziberritzea bultzatu nahi dudalako. Herrigintza egin nahi dudalako. Bidasoko euskarazko komunitatearen parte izan nahi dudalako. Bidasoak eta bidasoarrok behar dugulako. Zure ekarpena behar dugu, babestu tokiko euskarazko komunikabidea.
