Prestatzaile bizkaitarrak Aitor Zulaikaren postua hartu du, eta bi urte eta erdirako sinatu du txuribeltzekin.
Argazkia: Real Union. Ligan zeramaten bolada txarragatik, Real Unionek Aitor Zulaika entrenatzaile kargutik kendu zuen iragan astean, eta badu ordezkoa dagoeneko, David Movilla iritsi baita Stadium Galeko aulkira. Movillak (Barakaldo, 1980) bi urte eta erdiko kontratua sinatu du txuribeltzekin, eta Borja Agirretxu izango da bere bigarren prestatzailea.
Bizkaitarrak badu eskarmentua aulkietan, Arenas, Leioa, Barakaldo eta Zamora bezalako taldeak entrenatu baititu azken urteetan, eta Lehen Maila EEFF ondo ezagutzen du. Atzo zuzendu zuen bere lehen entrenamendua eta ostegunean eseriko da lehenengoz aulkian, Real Unionek ligako partida baitu Nova Creu Altan Sabadellen aurka.
Real Unionek jaitsiera postuetan jarraitzen du, baina ziur igandean lortutako garaipenak motibazioz bete duela taldea. Etzi izango dute bide horretan jarraitzeko aukera, 18:45ean. Sabadell sailkapeneko hamaikagarren postuan da, baina soilik bi puntuko abantaila du Real Unionekiko. Lehen Maila EEFF oso berdindua dago.
Bidasoari buruzko kalitatezko informazioa eta gertukoa jaso nahi dudalako. Euskaraz bizi nahi dudalako eta hizkuntzaren biziberritzea bultzatu nahi dudalako. Herrigintza egin nahi dudalako. Bidasoko euskarazko komunitatearen parte izan nahi dudalako. Bidasoak eta bidasoarrok behar dugulako. Zure ekarpena behar dugu, babestu tokiko euskarazko komunikabidea.
