Urtarriletik martxora, 327 ikastaro kiroldegietan
Izena emateko epea irekia dago jada eta hilaren 30ean itxiko da. Orotara, 3.483 plaza eskainiko dira, 1.547 Artalekun, eta 1.936 Azken Portun.
Argazkia: Irungo Udala. Irungo Udaleko Kirol arloak jakinarazi du zabalik dagoela jada 2023ko urtarriletik martxora bitartean Artaleku eta Azken Portu kiroldegietan egingo diren ikastaroetan izena emateko epea. Hilaren 30a izango da horretarako azken eguna.
Orotara, datorren urteko lehen hiruhilekorako 327 ikastaro programatu dituzte, igeriketako 225 eta aretoko 102. Artalekuk 157 jarduera jasoko ditu, eta Azken Portuk, aldiz, 170. Guztira, 3.483 plaza eskainiko dira, 1.547 Artalekun eta 1.936 Azken Portun.
Ikastaroen inguruko informazio guztia Irungo Udaleko webgunean kontsulta daiteke. Interesdunek webguneko esteka hori balia dezakete behin-behinean izena emateko; bestela, izena emateko fitxa bete daiteke, eta Artaleku eta Azken Portuko harreran dauden kutxetan utzi. Izen-emate fasea harpide zein harpide ez direnei zuzenduta dagoela nabarmendu du udalak.
Izena eman ondoren, izen-emateak berresteko fasea egingo da abenduaren 12tik aurrera. Horretarako, ohiko metodoak erabili beharko dira: aurrez aurre aurretik hitzordua hartuta edo internet bidez. Udalak gogorarazi du, izena emateko fase horretarako, prozedura internet bidez egin nahi dutenentzako beharrezko dela BAKQ txartela eguneratua izatea.
Hitzordu horretan, izen-emate bakarra egin daitekeela baietsi du udalak; baina zerrenda bakoitzeko hitzorduak bukatzen direnean (orotara, hiru zerrenda mota osatuko dira) aukera egongo da ikastaro gehiagotan izena emateko, betiere lekurik geratzen bada. Horrez gain, hiru zerrendetako hitzordu guztiak bukatzen direnean, izen-emateak egin ahalko dira, online edo aurrez aurre bi instalazioetako harreretan. Hitzorduen epea bukatzen denean, izen-emate libreen txanda irekiko da behin-behineko izen-ematerik egin ez dutenentzat.
Behin-behineko izen-ematea egin dutenen hitzorduen orduak abenduaren 1ean zozkatuko dira, 12:00etan. Jarraian, zerrenda horiek jendaurrean jarriko dira, era abenduaren 12an izen-ematea formalizatzeko epea hasiko da. Artaleku eta Azken Portuko igeriketa proba hilaren 26an egingo da, 10:00etatik 13:00era, Artalekun eta Azken Portun.
