Zaragozako Zuerako espetxean dago orain eta Eusko Jaurlaritzak erabakitzeke du zein espetxera lekualdatuko duten.
Fermin Vila, 2016an, familiaren etxean Fermin Vila Mitxelena Fermo preso irundarra Zueratik (Zaragoza) Euskal Herriko espetxe batera lekualdatuko dutela jakinarazi zuen atzo BERRIAk. Baieztapena, Espainiako Espetxe Erakundeek eta Eusko Jaurlaritzako Justizia Sailak eman duela adierazi dute. Oraindik ea Zaballa, Basauri edota Martutenera eramango duten ez dute argitu.
Irungo lau euskal preso politikoak Euskal Herrian egongo dira, beraz. Azken aldaketa duela aste batzuk izan zen, Iratxe Sorzabal Zaballara eraman zutela konfirmatu zutenean; Bestetik, Francisco Jose Ramada Bera, hirugarren graduan da, eta espetxealdia etxean betetzen ari da pultsera telematikoarekin; eta Aitor Olaizola Zaballako (Araba) espetxean da.
Bilbon urtarrilaren 7rako manifestazio handia antolatu dute Sarek eta Bake Bidea/ Bakegileak. Bi urte egon dira mobilizazio hau antola ezinik eta oraingoa “momentu indartsua” dela adierazi zioten antolatzaileek BERRIAri. Etxera bidea, Gertu da erabiliko duten lema eta Autonomia kaletik irten, eta Bilboko udaletxean bukatuko da.
Bidasoari buruzko kalitatezko informazioa eta gertukoa jaso nahi dudalako. Euskaraz bizi nahi dudalako eta hizkuntzaren biziberritzea bultzatu nahi dudalako. Herrigintza egin nahi dudalako. Bidasoko euskarazko komunitatearen parte izan nahi dudalako. Bidasoak eta bidasoarrok behar dugulako. Zure ekarpena behar dugu, babestu tokiko euskarazko komunikabidea.
