Oihana Briones, Irungo EH Bilduren alkategai
Koalizio abertzalearen oinarriek Brionesen hautagaitza berretsi dute eta bera izango da 2023ko udal hauteskundeen buru.
Hautagaiak proposatzeko barne prozesua bukatu ondoren, Oihana Briones Aramendi izango da 2023ko Irungo udal hauteskundeetarako EH Bilduren alkategaia. Koalizio abertzalearen araudian jasotzen den moduan, oinarriek Brionesen hautagaitza berretsi dute eskatzen diren baldintza guztiak bete dituela esanda.
Brionesek gutun baten bidez helarazi zien irundarrei bere hautagaitza. Alkategaiak adierazi du datorren maiatzeko hauteskundeei begira “aurrerapausoa” ematea erabaki duela eta “Irun eder, euskaldun, feminista eta berdinzaleagoa eraikitzeko prest” dagoela. Bide horretan, Irun hobetzeko bere “indar osoa” eta dituen “baliabide pertsonal guztiak” jarriko dituela baietsi du. Horrez gain, bere eta Irungo EH Bilduren “iparrorratza bizitza duintzen duen gai oro” izango dela iragarri du: pertsonen ongizatean, ekologian, trantsizio energetikoan edota etxebizitza politiketan.
