[Erreportajea] Helduek ere antzerkirako tokia izango dute Hondarribian
Tai Chi Chuan lokalean gaztetxoei zuzenduriko tailerrak emateaz gain, abendutik aurrera helduentzako taldea martxan jarriko du Mikel Sarriegi antzerki irakasle eta zuzendariak. Izen ematea zabalik dago.
Hondarribian antzerkiari bidea zabaltzen ari da Mikel Sarriegi. Duela bost urte hasi zen herrian antzerki tailerrak eskaintzen, hark bezala, herritarrek ere antzerkigintzan hasteko aukera izan zezaten. Gaztetxoentzako ez ezik, erretiratuentzako antzerki tailerrak ere ematen ditu. Azken horiek pandemiaren ondorioz bertan behera geratu zen, baina urtarriletik aurrera berreskuratuko dituzte klaseok. Orain, helduek ere beren txokoa izango dute. 18 urtetik gorakoak ostiraletan bilduko dira Tai Chi Chuan lokalean, 18:00etatik 19:30era. Sarriegirentzat erronka izango da honakoa, lehenengo aldia izango baita Hondarribian helduentzako saioak emango dituena.
Baina gogotsu dagoela ziurtatu du. Antzerkia inoiz egin ez dutenek teknikak eta tresnak ikasiko dituzte: eskarmentua dutenek, aldiz, ikasitakoan sakontzeko aukera izango dute. Hori bai, hori guztia jolasen eta ariketen bidez egingo dute, irakaslearentzat helburu nagusia ondo pasatzea baita: «Nik ez dut ulertzen antzerkia sufrimenduz egiten». Tailerraz gain, kurtso bukaerako emanaldi bat egitea aurreikusten du. «Tailerra emanaldi bat egiteko helburuarekin egiten denean beste erritmo batera joaten da». Gainera, Sarriegirentzat emanaldiarekin batera dator aktore baten benetako gozamena: «Helburu bat daukazunean horrelako zirrara bat sortzen da, eta aktore batek hori bizi behar duela uste dut. Antzerkia publikoarentzat egiten da. Horrek sortzen duen urduritasuna pasatzerakoan, hor sentitzen du benetan aktore batek gozamena».
Antzerkiaren onurak
Antzerkian aritzeak jendearen aurrean hitz egiteko gaitasuna lantzeko eta lotsa gainditzeko balio dezake, bai eta presentzia eta ahoskera lantzeko ere. Hortaz gain, sentimenduak askatzeko, adierazteko eta ondo pasatzeko aukera ere ematen du. Zentzu horretan, tailerra ostiraletan proposatzea ez da kasualitatea izan. «Astean zehar lanean daude herritar gehienak. Astea ondo bukatzeko, eta irri batzuk egiteko espazioa sortuko dugu. Antzerkiarekin jendeak sorpresak har ditzake. Ni neu engantxatu ninduen». Klaseetara batzeko 615 78 73 08 telefono zenbakira dei daiteke.