Trantsizio ekologiko justua aldarrikatzera egin du dei Sortuk
Azaroaren 12an manifestazioa egingo dute Bilbon, oligopolioek kontrolatu gabeko energia ereduaren alde.
Irungo Sortuk Repsol edo Iberdrolaren tankerako konpainia energetiko handien jarduna salatu du. Harropuzkeria, elkartasun falta eta diruzalekeria egotzi diete.
Oraintxe sumatzen den ekonomiaren inflazioa aipatu dute. Hori horrela, iaz, Josu Jon Imaz Repsoleko kontseilari ordezkariak 4,24 milioi euro irabazi zituela diote, egunean 11.600 euro litzateke. Ignacio Sanchez Galan Iberdrolako presidenteak ere irabazi nabarmenak izan ditu, 13,2 milioi euro irabazi ditu, egunean 36.160 euro.
Gizartea pobretzearen arduraduntzat jo dituzte eta haien asmo bakarra dirua egitea dela deitoratu dute. Gainera, ez daudela prest zerga gehiago ordaintzeko adierazi zutela oroitu dute, “inozo deitu digute”. Ankerra izan behar dela jarrera hori edukitzeko uste dute, gehienek gero eta gutxiago dutenean.
Errotik egin behar den aldaketaren alde dago Sortu; energia trantsizio justua eta demokratikoaren bidea defendatu dute. Horretarako, energia sektorean “berehalako” esku hartzea galdegin dute. “Herritarrek eta enpresa txiki eta ertainek energiagatik prezio justua ordaintzeko, gutxi batzuek denon kontura negozioa egitea galarazteko, berriztagarrietan oinarritzeko, CO2 isuriak gelditzeko eta oligopolio handiek nuklearra eta gasa bezalako energiak berdez ez margotzeko”.
Energia burujabetza ere proposatu du talde abertzaleak, hau da, Euskal Herrian ekoiztea bertan behar den energia. Izan ere, egun, energia ia guztia inportatu egiten da, zehazki, EAEn, %90a eta Nafarroan %79a. “Menpekotasun horrek gure herria zaurgarri egiten du, orain ikusten ari garen bezala”.
Oligopolioen interesetatik at, energia beharrak planifikatu eta berriztagarrietan oinarritutako trantsizio energetikoaren alde borrokatzeko deia egin dute. “Olatu bat altxa behar dugu”. Itsaso hori astintzeko azaroaren 12an manifestazioa egingo dute Bilbon, EH Bilduk deituta eta Abante leloarekin.
Autobusak antolatu dituzte manifestaziora joateko. Informazio osoa, esteka honetan.
