Hilabetero egiten duten bezala, kontzentrazioa egingo dute bihar 20:00etan euskal presoek etxerako bidea egiten jarraitzeko helburuarekin.
Hilabetero egiten duten bezala, azken ostiralerako elkarretaratzea deitu du Irungo Etxeratek. Kontzentrazio hori bihar izango da, 20:00etan, Zabaltza plazan. Lehenik eta behin, Jon Kepa Parot eta Jakes Esnali “besarkada bero bat” bidali nahi diete jasandako 33 urteko espetxealdiaren ondoren. Etxeratetik esan dute haien askatasuna ez dela “erabatekoa”, baina kartzelatik atera dira gertukoekin egoteko. Egoera hori Ipar Euskal Herriko gizarte zibilaren, erakundeen eta herritarren mobilizazioari esker izan dela zehaztu dute, “haien inplikazio eta lanarekin bien askatasuna behin betiko bideratzen lagundu baitute”.
Urrunketa ere hizpide izan dute euren lerroetan, eta urrunketa horrekin bukatzeko mobilizazioa eta herritarren bultzadak “bere fruituak” ematen dituela eutsi dute Etxerateko kideek, beste hamaika preso hurbilduko baitituzte egunotan Euskal Herrira. “Ez da asko geratzen hala izan dadin, baina ez dugu erabat bukatu presoen urrunketarekin”, esan dute. Horrez gain, presoek eskatzen dituzten gradu aurrerapenak deuseztatu, baimenak debekatu eta gainerako salbuespen neurriak errekurritu eta Espainiako Auzitegi Nazionalak bertan behera uzten dituela salatu dute Etxeratetik.
Espainiako justiziak Xabier Atristainen eskubideak urratzeko erabili duen “zentzugabekeriarekin haserre” daudela nabarmendu dute. Espainiako Auzitegi Gorenak “muzin” egin zion Giza Eskubideen Europako Auzitegiaren epaiari, zeinak ondorioztatu zuen Atristainek ez zuela “epaiketa justurik izan”. Orain, gainera, Auzitegi Nazionalak, “baldintza guztiak betetzen zituelarik”, Eusko Jaurlaritzak Atristaini emandako hirugarren gradua ukatu duela salatu dute Etxeratetik.
Etxeratetik azpimarratu dute euskal presoek haien ibilbide juridiko-penitentziarioaren aldeko apustuarekin jarraitzen dutela; baina horren aurrean, Auzitegi Nazionalak tratamendu batzordeen eta Eusko Jaurlaritzaren erabakiak geldiarazten dituela esan, eta “etxera itzultzeko bideari eustea” eragozten dietela baietsi dute Etxeratetik.
Etxerako bide hori betetzea da Sarek antolatutako hilaren 8ko mobilizazioaren eta Ilunbeko jaialdiaren helburua. “Bihotzez” eskertu nahi dute jendearen parte hartzea, “bidea jarraitzen” ari direla egiaztatzen baitu: “Aurrera egitea, euskal gizarteak mobilizatzen jarraitzea, euskal preso, iheslari eta deportatu guztiek etxera itzultzeko prozesua egin ahal izan dezaten lortu arte. Guztion erantzukizuna delako, eta, hori gabe, ezinezkoa izango delako bizikidetzan aurrera egitea herri honek egiteke duen etorkizunerantz”.
