Zinema haurrentzat, euskaraz eta doan
Bihartik, abendura bitarte, asteburuetan eta arratsaldez, euskarazko pelikulak zinema aretoetan disfrutatzeko aukera egongo da.
Euskara Arloak haurrengan pentsatuta Zinema haurrentzat programa sortu dute. Abendura bitarte, hainbat asteburu arratsaldetan doako hamar proiekzio antolatu dituzte, horietatik zortzi bikoiztutakoak eta bi euskarazkoak.
Mendibil merkataritza guneko OCine aretoetan eskainiko dituzte eta 8 eta 12 urteko haurrei begira antolatutako zerbait bada ere, edonork joan ahal duela zehaztu dute agerraldian izan diren Miren Etxebeste Euskara ordezkariak eta Iñigo Gaiton Euskara arloko teknikariak.
Asmo nagusia euskaraz kultur kontsumoa indartzea eta gozamenaren bitartez euskararen normalizazioan aurrera egitea dira. Etxebestek gogoratu du egitasmo hau EAJk egindako zuzenketa bati esker sortu dela. Txikis del Bidasoaren babesa eduki dute eta ikastetxeekin hedapen lanetarako aritu dira harremanetan, “gure inpresioaren arabera, interes handia sortu du ekimenak”.
Sarrerak eta pelikulak
Pelikula guztiak 16:00etan izango dira eta sarrerak Mendibileko leihatilan jaso beharko dira, 15:30etatik 22:00erako ordutegian, egun bat lehenago. Denak salduko ez balira, egunean bertan erosteko aukera egongo da.
Sarrerekin arduraz jokatzeko eskatu du Gaitonek. “Behar diren sarrerak hartu bakarrik”. Doakoak dira eta pertsona bakoitzak lau har ditzake, baina azken momentuan ikusleak ezin balu zinemara joan, gertuko bati emateko eta OCineko leihatilan itzultzeko esan du.
Pelikulen hautaketa zineuskadi.eu orrialdea erreferentzia gisa jarrita egin dutela azaldu dute. “Kalitatezko eskaintza osatu da”, baieztatu du Gaitonek. Horrez gain, 8 eta 12 urte bitarteko haurrengan pentsatu dute baina gomendio bat dela zehaztu du, adin guztietako edonor joan daiteke.
Programazioa
Urriak 22, larunbata. D’Ortagnan eta hiru mosketxakurrak.
Urriak 23, igandea. Oltxiak.
Azaroak 5, larunbata. Lur eta Amets.
Azaroak 6, igandea. Space Jam: Aro berria.
Azaroak 12, larunbata. Ainbo: Amazoniako gerraria.
Azaroak 13, igandea. Ilargirantz.
Azaroak 19, larunbata. Trash.
Azaroak 20, igandea. DC Supermaskoten Liga.
Abenduak 3, larunbata. Tom eta Jerry.
Abenduak 4, igandea. Orkestra Lurtarra.
