III. Gazteartean bekak Irungo LGTBI kolektiboko gazteen beharrak ikertu ditu
Irungo gazteek sexu generikoari eta honi lotutako diskriminazioei buruz duten pertzepzioa eta jarrera landu dute Uxue Diez eta Maite Azabalek.
Gazteartean bekaren hirugarren ediziorako hautatu den proiektuaren berri eman du Santi Jimenez Gazteriako ordezkariak. Bekaren asmoa sortu den egitasmo edo ideia autonomoki garatzea da eta 35 urtetik beherakoei zuzenduta dago.
Ikerketa Maite Azabal Gallego eta Uxue Diez Guiralek egin dute eta azterketaren izenburua LGTB gazteak Irunen: ba al dakigu zer dagoen? da. Xedea LGTBI+ gazteen problematikak, beharrak eta eskaerak aztertzea izan da. Irungo gazteek sexu generikoari eta honi lotutako diskriminazioei buruz duten pertzepzioa eta jarrera landu dute, baita “arauz kanpoko identitateen integrazioa” ere.
Irun hiri inklusiboa dirudiela adierazi dute ikertzaileek, baina “badirudi oraindik diskriminazio-egoerak gertatzen direla, eta egoera horiek eragozpen gisa jokatzen dutela gizarte-talde disidenteen inklusioa lortzerako orduan”. Emaitzetan ikusi dute inklusibotasuna ez dela erreala. “Emaitzek hiriko gazteek Irungo LGTBI+ gazteek hezkuntzaren alorrean gutxiago integratuta daudela uste dutela erakusten dute, Irungo gainerako esparruekin espazio publikoa, aisialdia, kultura eta osasun eremuak- alderatuz”.
Oraindik ere beharrezkoa dela LGTBIQ+ kolektiboko gazteen aldeko diskriminazio positiboa diote, “egungo egoera eta ibilbide historikoa kontuan hartuta”. Horretarako, proiektua ikuspegi feminista eta intersekzionalaren bidez bideratu nahi izan dute ikertzaileek, proiektuaren urrats guztietan. Arretaz zainduko dute hizkera inklusiboaren erabilera eta feminismotik abiatutako hausnarketa, queer eta LGTB teorien funtsezko muina baita hori adierazi dutenez.
Gazteriako ordezkariak nabarmendu nahi izan du “gazteekin eraikitzeaz mintzatzen garenean ez gara ari gazteei kontsulta egiteko bide bat jarri eta gero Udalak erabakitzeaz. Aitzitik, erantzukizun partekatuaz eta ahalduntzeaz ari gara, erabakiak hartzen diren espazioen parte izateaz eta eguneroko bizitzan norengan eragina duten gauzen protagonista izateaz”. Azkenik, gazteek politika instituzionalean parte hartu behar dutela uste du eta udal agenda eta ekintza politikoa markatzeko eta horietan eragina izateko mekanismoak behar dituztela esan du.
