Helduek bizikletan zirkulatzen ikas dezaten tailerra egingo dute
Bi egunekoa da tailerra, hilaren 20an eta 22an. Hiru orduko tartea hartuko dute egun bakoitzean tailerrerako.
Irungo Udaltzaingoko Bide Hezkuntzako sailak helduei begirako tailerra antolatuko du, Irungo kaleetan bizikletarekin zirkulatzen ikas dezaten. Bi eguneko tailerra da, hilaren 20an eta 22an egitekoa. Bi egunetan hiru orduko tartean (10:00etatik 13:00etara) irakatsiko diete udaltzainek izena ematen dutenei bizikletan hiritik mugitzen, talde txikitan (hamar bat lagunekoak). Tailerra praktikoa izango da, eta Ibarlako bide hezkuntzako pistan egingo dute.
Iniziatibarekin bat egin nahi dutenek hilaren 5etik 16ra arteko epea dute izena emateko, Irungo Udalaren webgunearen bitartez, edo 010 telefono zenbakira deituz. Oharra: partaide bakoitzak bere bizikleta eraman beharko du, eta gomendatu dute kaskoa eramatea, eta arropa erosoarekin azaltzea.
