Ioseba Amunarriz: "talde honek grin handia du eta estropada bukatu arte borrokatuko du"

Lehen eta bigarren postuak eskuratu ditu Ama Guadalupekoak, asteburuan, EuskoLabel Ligan. Emakumezkoek ere bandera eskuratu eta B ontziko mutilak seigarren izan ziren Camargon.

Ane Mendizabal Sarriegi

Hondarribia

2022/08/01

Asteburu bikaina izan da Hondarribiko Arraun Elkarteko hiru traineruentzako. EuskoLabel eta ETE Ligetan lider mantentzen dira eta B ontziko mutilak 7. postuan daude, 6.etik puntu batera.

Larunbatean Getxoko uretan izan ziren A ontziko arraunlariak. Bertan eremu berrian lehiatu ziren estreinakoz. Donostiarrarekin lehia oso estu joan zen bukaerara arte. Berdeek atzetik aurrerako estropada egin zuten eta amaieran bandera segundo batera izan zuten. “Donostiarra oso gertu ikusi genuen eta beste puntu horren bila joan ginen” azaldu du Ioseba Amunarrizek. Eremu berriari dagokionez ez dio aldaketa askorik antzeman Hondarribiko patroiak, “Getxoko estropadak ia berdinak izaten dira denak. Arraun egiteko eremu zaila izaten da. Urak oso gogorrak zeuden”.

Igandean, aldiz, Lekeition izan zuten estropada, astelehenean Euskadiko Txapelketa jokatu zen eremu berdinean. Oraingo honetan, ordea, kondizioak zeharo ezberdinak izan ziren, haizearen aldetik bai eta itsasoaren aldetik ere. “Astelehenean kale hoberena ‘printzipioz’ bata zen, atzo aldiz hirugarren eta laugarrenak ziren”. Baina Hondarribiarrek argi dute edozein kondizioetara moldatu beharra dagoela aurrean aritzeko, “eta horretan saiatu ginen”.

Estropada osoan Urdaibairen aurretik izan ziren. Azken ziabogaren ondoren, ordea, bizkaitarrek aurrea hartu zieten. Une horietan zaila izaten da lasaitasuna mantentzea eta presaka hasteko arriskua izaten da. Hala ere, “taldeak aurrean ibiltzeko zer gogo duen ikusita eta gauzak ondo egiteko duen gogoa ikusita, edozein momentutan borrokarako prest gaude. Detaile txikiek markatzen dute diferentzia. Talde honek grin handia du eta estropada bukatu arte borrokatuko du” azaldu du.

Bandera irabazteko beste gakoetako bat kalea mantentzea izan zen. “Hasieratik argi genuen haizea eta korrontea zegoen bezala egonda gure bila etorriko zirela eta bagenekien gure kalea mantenduta azkeneko metroetan gure alde izango genuela eremua. Espero ez genuena Bermeo gure gainera horrenbeste etorriko zela zen, baina estropadako gauzak dira horiek. Tentsio askoko estropada izan zen. Helmugaratu ginenean ez genuen jakin irabazi genuela esan ziguten arte.

Asteburu honen hondoren Hondarribia lider da.

Sailkapen orokorra

1	Matrix Hondarribia	111
2	Amenabar Donostiarra Ur Kirolak 100	108
3	BERMEO URDAIBAI	104
4	ORIO ORIALKI	96
5	KAIKU BEREZ GALANTA	62
6	GETARIA	61
7	ZIERBENA BAHIAS DE BIZKAIA	57
8	CR CABO DA CRUZ	41
9	LEKITTARRA ELECNOR	39
10	ONDARROA CIKAUTXO	35
11	ITSASOKO AMA-SOTERA	34
12	CLUB DE REMO DE ARES	31

Atzoko egunez, harrera egin zieten arraunlariei Hondarribian. Ondoren, Arrantzaleen Hermandadean ospatu zuten.

ETE Liga

Hondarribiak eta Hibaikak lehia garrantzitsua izan zuten asteburuan, izan ere, dagoeneko ligako estropaden erdia jokatu dute. Zortzi estropaden ondoren lehen eta bigarren postuan dira, hirugarrenetik, playoffa jokatzeko postuan dagoen Deustorengandik, 8 eta 7 puntuetara.

Camargoko uretan (Kantabrian) lehiatu ziren larunbatean eta estropada gogor baten ondoren Hondarribiarrak izan ziren garaileak. Ondoren, Hibaika bigarren izan zen bi segundotara. Hirugarren amaitu zuten Deustuko neskak irabazlearengandik hamalau segundotara.

Sailkapen orokorra

	Elkartea	Puntuak
1º	HONDARRIBIA BERTAKO IGOGAILUAK	73
2º	HIBAIKA JAMONES ANCIN	72
3º	DEUSTO BILBAO	65
4º	DELTECO ZUMAIA	53
5º	ONDARROA CIKAUTXO	42
6º	ZARAUTZ GESALAGA OKELAN	39
7º	HERNANI MITXELENA	33
8º	CASTRO CANTERAS DE SANTULLAN	17
9º	PORTUGALETE	11

KAE 1 Liga

Hondarribiko B ontziko gizonezkoek estropada ona burutu zuen larunbatean. Hauek ere Camargoko uretan. Bigarren tandan fin aritu ziren haizeari eta ur gogorrei aurre eginez. Estropada Pedreñak irabazi zuen, bigarren Arkote izan zen eta hirugarren San Juan ontzia, (irabazlearengandik 72 zentesimetara). Sanpedrotarrak berriz bostgarren izan ziren.

Sailkapen orokorra

	Elkartea	Puntuak
1º	SANPEDROTARRA	94
2º	ARKOTE SEGUROS BILBAO	89
3º	S.D.R. PEDREÑA	84
4º	SAN JUAN	81
5º	ZARAUTZ GESALAGA OKELAN	77
6º	DELTECO ZUMAIA	54
7º	MATRIX HONDARRIBIA	53
8º	CASTRO BRUNO SAEZ	49
9º	DEUSTO BILBAO	43
10º	CAMARGO CUEVA EL PENDO	36
11º	ORIO ORIALKI	27
12º	BUSTURIALDEA	15

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.