Kasino Zaharra irekitzeko eskatu du berriz Abotsanitzek
Adinekoen egoitza irekitzeko eskaerak errepikatzen ari dira eta Abotsanitzek egin du azkena. Udal gobernuari gizalegez jokatzeko aferarekin galdegin diote.
Neguan Abotsanitzek Kasino Zaharraren irekiera eskatu zuen eta eskaera bere horretan geratu zen. Jarraian, udalak itxita egotearen arrazoia komisio falta zela azaldu zuen. Duela hilabete zabaltzeko eskaria egin zuten ere Hondarribiko jubilatu eta pentsionistek. Egun, 42 urte beteko lituzke Kasino Zaharrak adinekoen egoitzaren funtzioa betetzen.
Gaur, berriz argudiatu du Abotsanitzek ezinbestekoa dela adinekoen egoitza hau irekitzea: “Adineko pertsonek dituzten beharrei erantzuteko; elkartzeko gunea da, autonomia ahalbidetzen du, gune osasuntsua da, eguzki izpi eta bero zakarretik babesa eskaintzen du”.
Alkateari eta Gotzone Larrarte Gizarte Zerbitzuetako zinegotziari galdegin diote ez atzeratzea gehiago zabaltzearen eginbeharra eta gizalegez jokatzeko. “Hondarribiko Udalak pertsonak zaindu behar ditu, bereziki zaurgarrienak, eta maitasunez lagundu behar ditu. Kasu honetan adineko pertsonek udako beroaldi garai hauetan gune seguru eta babestuan egoteko zerbitzu publikoa eskaintzea eskatzen diogu udal gobernuari”.