Africa Unitedek panafrikanismoa aldarrikatu zuen atzo Santiago zubian, bertako arazoa errotik konpontzeko

Melillako sarraskia irudikatu zuten Sorturekin batera egindako deialdian. Gipuzkoatik Lapurdira ezin pasa izatearen arrazoia arrazista da elkartearen hitzetan eta Frantziako estatuaren politikak bai Afrikan eta bai Euskal Herrian salatu zituzten.

Alaine Aranburu Etxegoien

Irun

2022/07/12

Atzo, Santiago zubia itxi zuten Africa United Nafarroa eta Sorturen deialdiari jarraiki. Ekainaren 25ean Melillako hesia pasa nahian hil zirenenak gogoan izateko eta sarraski hura salatzeko elkartu ziren nagusiki. Era berean, Afrikatik etorritako euskaldunek bizi duten arrazismoa gaitzetsi zuten, baita Frantziako estatuaren politikak kontinente beltzean ere.

Melillako sarraskia irudikatzen zuten bitartean, elkarteko Modou Fayekek hartu zuen hitza eta mendebaldeko gizartearen sistemak Afrikako herria zapaltzen duela eta afrikarrei Europan bizitzea ezinezkoa egiten dietela salatu zuen hasteko. Europan ezin dutela lasai bizi diote eta ahal izaten dutenean “adeitasun paternalista eta iraingarria” jasaten dutela adierazi zuen.

Gogoan izan zituzten Libian esklaboak direnak, Ceuta eta Melillan gogoz kontra harrapatuta daudenak eta zigorrik gabe Tarajalen hil zituztenak. Bidasoa ibaiaren gainean, Melilla eta Tijuanako (Mexiko) hesi bera ezarri dutela deitoratu dute eta ebidentzia horrekin batzuek eskubide gutxiago dituztela azal koloreagatik edo jatorriagatik nahi duten lekura joateko azaleratu zuten. “Ezin dute Gipuzkoatik Lapurdira pasa beraien bizitzak arriskuan jarri gabe”.

Afrikako herriak eta herritarrak zapaltzen eta menperatzen duen kolonialismoa “gogor” salatu du elkarteak eta horrek berehala gelditu behar duela galdegin zuten. “Herri guztiak, pertsona guztiak, eskubide guztiak mundu guztiarentzat. Zatitzen dituzten mugei ez”.

Fayeken hitzetan, beraiek, “bizirik atera diren horiek”, Iruñean bizi direla eta ez daudela salbu mahai gaineratu dute, polizia haien gainean dagoela jakitun direla azalduz. “Bizirik atera garenak gara bidegabekeria hau ozen oihukatzeko, eta salatzeko ere Mendebaldeko gobernuen konplota, zeintzuek elkarri laguntzen baitioten beren eredu ekonomikoa Afrikako aberastasunei esker eusten jarraitzeko”.

Elkarteak, Frantzia Afrikako “minbizia” gisatzat jo du eta ez dela kasualitatea Frantziak Afrikatik migratzen ari direnei sarrera ukatzea uste dute. “Frantzia bera, gure lurretan nahi bezala dabilena da eta ez dabil adiskidetasunez edo elkartasunez. Ezta ere ez daude bertan haien etorkizuna zintzotasunez bilatzeko, gu hemen gabiltzan bezala. Bere erara egiten du, modu krudel eta bortitzean, baina Mediterraneoaren alde honetan hain ikusezina da hori… Frantziak beste gobernu batzuekin itunak egiten ditu, Frantziak bere armada hedatzen du, Frantziak gure baliabideak ustiatzen ditu, Frantziak gure moneta kontrolatzen du”.

Panafrikanismotik arazoa erroetatik tratatzen dutela eta ardatza ez dagoela immigrazioan baizik eta “mendebaldeko termino interbentzionistetako Afrikako politiketan” diote. Ez dela inoiz deskolonizatzen saiatu diren gobernu afrikarrez eta horren ahaleginetan gobernu europarrek hil dituzten lider politikoez hitz egiten gaitzetsi dute ere.

Ildo horretan, hausnarketara bultzatu dituzte herritarrak. “Munduko sistema politiko ekonomikoan nagusi den bidegabekeriaren aurkako borroka salatzen jarraitzera animatzen zaituztegu”. Azkenik, Melilla eta Irunen hil direnen bizitzei errespetua erakusteko doluminak eman zizkioten haien familiei. “Ez zaituztegu ahaztuko. Borrokak segituko du. Africa United“.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.