Diana kalean behin-behineko aparkalekuak egingo dituzte
Irunvik oniritzia eman dio lurzorua lagatzeari, eta 45 toki eta motoak aparkatzeko eremu bat egingo dira.
Diana kalea, Elitxu-Lapitze auzoan. Argazkia: Google maps. Diana kalean behin-behineko aparkalekuak egiteko proiektuak argi berdea jaso du. Izan ere, aparkalekuak egiteko lurzorua Irunvirena da, eta azken honek oniritzia ematea falta zen proiektuak aurrera egiteko. Atzo bertan Etxebizitzarako Elkarte Publikoko Administrazio Kontseiluak lurzorua lagatzea onartu zuen, eta orain lizitatzea baino ez da falta.
Egitasmoak jasotzen duenez, autoentzako 45 aparkaleku berri eta motorrentzako eremu bat egingo dituzte, eta Miguel Anbulodi kaletik sartu ahal izango da. Lanak egiteko aurrekontua 130.000 euroko izango da. Aparkalekuak, ordea, behin-behinean jarriko dituztela jakinarazi du udalak, oraindik ikusteko baitago nola geratuko den Txenperenea.
Cristina Laborda Obretako ordezkariak nabarmendu du Irunviren oniritzia elkarrizketen emaitza izan dela, eta hemendik aurrera, “aparkalekua ahal bezain laster eraikitzeko pausoak ematen” jarraituko dutela. Borja Olazabalek, berriz, lan horiei esker, bizilagunek hobeto aparkatu ahal izango dutela nabarmendu du.
