"Geroz eta beharrezkoagoa da udal alardea berreskuratzea"
Alarde Parekideko Juntak aurtengo ospakizunaren gaineko balorazioa egin du, eta emakumeak eta gizonak pare dituen alardearen parte hartzea handituz doala esan du.
![](https://bidasoa.hitza.eus/site/files/2022/07/alardea.jpg)
Aurtengoa “aspaldiko alarderik zirraragarriena” izan dela adierazi du Alarde Parekiko Juntak, ospakizunaren gaineko balantzean. Bi urteko geldialdiaren ondoren, “inoiz baino Alarde jendetsuagoa” egin dutela azaldu du, eta ia 2.000 lagunek parte hartu dutela.
Juntaren arabera, ehunka eta ehunka dira alardean barrutik parte hartu nahi duten emakumeak, eta hori dela eta, egunetik egunera beharrezkoagotzat jotzen du hiriak Udal Alardea berreskuratzea: “Udalak alarde bateragarri bat bermatu behar du, bizi garen garaietara egokitua, bazterkeriarik gabekoa, gure hiriaz, gure tradizioez eta gure jaiez harro sentiaraziko gaituena”. Udalak antolatutako alardea mendeetako tradizioa dela gogorarazi du.
Eskerrak eman dizkie desfilatu duten guztiei, baita azken 25 urteetan Alarde Parekidea babestu eta lagundu dutenei ere. Horien artean agintariak izan ditu gogoan, hartzen duten arduragatik. Espaloietan babesa ematen aritu zirenei ere aipamena egin die. Horrez gain, Emakunde eta Gipuzkoako Foru Aldundiari ere eskerrak eman dizkie alardea ekonomikoki ahalbidetzeagatik.
Aurten aipu egin die ere udal taldeei ere, PPk izan ezik, lehen aldiz harrera egiteagatik Alarde Parekideari udaletxeko balkoian. “Bide batez, Jose Antonio Santano alkatearen ezezko jarrera are barregarriago geratu da, eta gero eta itsusiago da herritarren zati inportante bati bizkar ematea”, gaineratu du.
Alardearen alde aritu diren horiei esker, helburua lortzen jarraitzera bultzatzen dituela esan du juntak: irundar guztiak batzeko eta bateratzeko gai den alarde bat egitea.