Hondarribiko jaietako kartel lehiaketa martxan da
Dagoeneko zabalik dago 'Hondarribiko Jaiak 2022ko Iraila' kartel lehiaketara aurkezteko epea. Uztailaren 8a izango da azken eguna.
'Hondarribiko Jaiak 2022ko Iraila' kartel lehiaketa. Hondarribiko Udalean dagoeneko 2022ko jaiak prestatzen ari dira. Ostegun honetan izango da herritarrek egitarau ofizialerako ekintzak proposatzeko azken eguna eta hurrena, jaietarako kartel aukeraketa izango da.
Uztailaren 8ra arte edonork ‘Hondarribiko Jaiak 2022ko Iraila’ kartel lehiaketan parte hartu ahal izango du. Sariak honakoak dira: Lehenak 650 euro eskuratuko ditu, bigarrenak 300 euro eta hirugarrenak 200 euro.
Baldintzak
- Lan guztiek ‘Hondarribiko Jaiak 2022ko Iraila’ lema atxikita izan behar dute.
- Tamaina 70 x 50cm-koa izan behar du (era bertikalean).
- Parte hartzaile bakoitzak gehienez lau lan aurkeztu ahal izango ditu.
- Koloretan edo zuri beltzean izan daitezke.
- Teknika librea da: argazkia, marrazkia, collage-a eta abar.
- Lan originalak eta berriak behar dute izan.
Bestalde, udaletik gogorarazi nahi izan dute egitarau ofizialerako ekintzak proposatzeko eskaera orriarekin batera Erantzukizun Zibileko Aseguru Poliza izenpetzea derrigorrezkoa dela. Informazio gehiago Kultura Sailaren bulegoan (Panpinot kalea, 14, 2.solairuan) edo hurrengo telefonoan (943111283) eskuratu daiteke.
