Josune Mendigutxia: "Izugarrizko kolpea jasaten dugu moralki horrelakoak gertatzean"
Bidasoa ibaian gertatutako azken heriotzaren aurrean, beste behin kontrol arrazistekin amaitzeko eta harrera hobea egiteko eskatu du Irungo Harrera Sareko kideak.
Josune Mendigutxia IHS kidea migranteei Hilanderaseko dispositibora joaten laguntzen. Egunero moduan, San Juan plazara hurbildu da Josune Mendigutxia IHS Irungo Harrera Sareko kidea. Gaur, ordea, prentsaren presentzia ohi baino handiagoa izan da. Atzoko elkarretaratzearen biharamunean, ordea, eskaerak berberak izaten jarraitzen dute: Frantziak muga irekitzea eta Irunen harrera hobea egitea. “Estatuek eskatu behar diote Frantziari muga hori irekitzea, legez kanpokoa delako, kontrol arrazistak direlako”, adierazi du Mendigutxiak. Bestalde, Irunen egiten zaien harrera behar duten mailakoa ez dela adierazi du: “Gurutze Gorriak esaten badie ‘hiru egun dituzue hemen geratzeko’ edo ‘bihar ezin zara hemen gelditu’ zerbait larria gertatzeko arriskua areagotzen du”.
Abderraman Banen heriotza bezalako gertakariak “kolpe gogorra” direla adierazi du IHSeko kideak, eta “ukituta” geratzen direla, “inpotentzia handiarekin geratzen gara, eta susmoarekin berriro gertatuko dela eta ezin dugula ezer egin”. Gainera, azken bi asteotan migratzaileen fluxua handitu dela jakinarazi du, eta horrek arriskua ere areagotzen duela.
IHSek, ordea, betiko lanarekin jarraituko duela berretsi du: “Gure martxan jarraituko dugu, salatu behar den guztia salatzen, eta batik bat muga hori irekitzea eskatzen, uste dugulako hori ireki arte ez direlako gauzak konponduko”.
