EAJ-k "haratago" joan nahi du Irungo egoera soziala hobetzeko
Aurreko astean onartutako zuzenketez gain, beste zenbait proposamen egin dituzte jeltzaleek landuko dituztenak.
Joan den ostiralean Irungo Udalean 14 milioi euroko kreditu aldaketa egin zen eta EAJ-k akordio bat lortu zuen gobernuarekin “Irungo herritarren bizi baldintzak hobetu eta Irun kohesionatuago bat sustatzea helburu” duena jeltzaleen arabera.
Proposamen hauek egin zituen EAJ-k: Amaia KZren irisgarritasuna hobetzea dibertsitate funtzionala duten pertsonentzat, material berriak lortzea auzoetako adinekoentzako zentro eta lokaletarako, hirian boluntariotza sustatzeko kanpaina bat egitea eta 2030 Agenda eta GJHak zabaltzea eta gizarteratzea.
Dena den, “haratago” joan nahi dutela adierazi dute eta “askoz gehiago eskaini” dezaketela uste dute Irungo egoera soziala hobetze aldera. Hizpide izan dute hiriaren biztanleria errealitatea “65 urtetik gorako 17.178 pertsona, eta atzerrian jaiotako 9.589 pertsona daude Irunen. Gure hiriak zer behar duen erakusten diguten datuak dira hauek”.
Ildo horretan, Gizarte Zerbitzuen plan estrategiko baten beharra dagoela uste dute. Horretarako, ordezkari politiko, udal teknikari eta hirugarren sektoreko erakundeen iritziak batzea eta adostea beharrezkoa eta interesgarria dela diote.
Zuzenketetan onartutako aldaketez gain, beste zenbait ekimen azaleratu dituzte, esate baterako, Gizarte Zerbitzuak deszentralizatzea, Lucas de Berroa kaleko eraikinaren erabilera egokitzea, hiriko eta auzoetako gizarte premiak aztertzea, adinekoentzako laguntza zerbitzu bat sortzea, cohousing proiektua, Luis Mariano Gizarte Gunean hobekuntzak egitea, etxez etxeko laguntza zerbitzuan hobetzeko ideiak, migrazioen arloko langile teknikoaren lanpostu berri bat sortzea edota Irunerako kultura planari ekitea.
Datozen hilabeteetan “ekimen ugari prestatu eta proposatzea” dela asmoa adierazi du EAJ-k. “Halaber, bide honetan kalteberatasun eta hauskortasun handiena duten pertsonak babesten eta laguntzen saiatu behar dela uste dugu”.