Haurrentzako sukaldaritza udalekuak egingo dituzte
Ekainaren 27an hasiko dira Elika eskolaren udalekuak, eta iraupena haur bakoitzak erabaki ahal izango du. Xedea sukaldaritza praktiko bat egitea dela adierazi dute, nutrizioa oinarri izanda.
Elika eskolak bere ateak pandemia bete-betean ireki zituen 2020an, eta dietetika, nutrizioa, sukaldaritza praktikoa, psikologia eta psiko-nutrizitatearen bueltan egiten dute lan. Haien lokalean nahiz online eskaintzen dituzte zerbitzuak, eta orain, modu presentzialari bidea ireki, eta bi hitzaldi antolatu dituzte haur zein helduentzako: Zure azken dieta: Agur bikini operazioa hitzaldia egin zuten asteazkenean Zuloaga Etxean; bestea Haurren osasuna programatu daiteke? izenburukoa da, hilaren 30ean, Egiluze ikastetxean, 17:00etan.
Hitzaldiez gain, nobedade nagusienetarikoa da udaran zehar ekaina bukaeran hasita egingo diren haurrentzako sukaldaritza udalekuak. Garazi Lizarraga eskolako dietista eta nutrizionistak eskainiko ditu, eta bere hitzen arabera, haurrekin «sukaldaritza praktiko bat» egitea da helburua. «Beraien egunerokotasunerako baliagarriak izan daitezkeen platerak egiten ikasiko dute. Plater sinpleak izango dira, dilista batzuk edo arroza, edo pizza bat astebururako».
Betiere aspektu nutrizionaletik landuko dute, eta zein elikagai dauden ikasiko dute, baita produktuen etiketatua nola irakur daitekeen erosketa egiterakoan ere. Beraz, praktikotasuna sukaldean ez ezik, kanpoan ere jorratuko dute. Horretarako, txango bat egingo dute inguruko baratzeetara, elikagaiak nondik datozen jakiteko, edota supermerkatura joango dira.
Eli Gallego eskolaren sortzaileak azaldu du, orokorrean, haurrentzako elikadura ikastaroak postreei buruzkoak izan ohi direla, eta joera horretatik aldentzeko nahia adierazi du. «Guk nahi duguna da haurrek egunero egin daitezkeen gauzak ikastea. Ez bakarrik dilista normal batzuk; hanburgesa bat nola egiten den ere ikas daiteke, eskuak zikintzea asko gustatzen zaielako». Lizarragak gaineratu du testura berriak dastatzen ikasiko dutela, hori baita, askotan, elikagai berriak gustatzea edo ez gustatzea eragiten duen arrazoi nagusienetako bat txikienen artean.
Kalean haurrentzako menuak egon ohi direla esan du Gallegok, baina «anti dena» direla uste du: «Haurrei beti kroketak eta makarroiak jartzen zaizkie, eta postrean izozkia. Nik uste dut txikitatik ikasi behar dutela gauza horiek tarteka jateko direla».
Astero edo bi astetik behin eman dezakete izena www.elikaeskola.com/talleres-saludables orrialdean. Astebete, bi aste, edota udara osoa iraun dezakete udalekuek, norberaren nahierara