Jaitzubiako padurak ez kaltetzeko, bidezidor bat kenduko dute
Ibilbide zirkular bat sortuko dute Jaitzubiako paduren inguruan. Horretarako, Bekoerrotako bidexka bat kenduko dute eta bidegorria osatu.
Espainiako Gobernuko Gipuzkoako Itsasertzetako Buruzagitza Probintzialak, Jaitzubiako paduren birsortzea ekiditen duen bidezidor bat kenduko du eta beste mendi bide batengatik ordezkatu, udalarekin elkarlanean. Era honetan, ibilbide zirkularra osatuko da paduren bueltan.
Proiektu honen aurkezpena egin dute gaur Denis Itxaso Gobernuaren ordezkariak, Amaia Barredo Eusko Jaurlaritzako Ingurumen Jasangarritasuneko sailburuordearekin eta Txomin Sagarzazu Hondarribiko alkateak.
Lan hauetara 595.382 euro bideratu dituzte eta azaroaren 30ean amaitzea aurreikusi dute. Horretarako, Eusko Jaurlaritzak obrak egingo dituzten lurrak desjabetu ditu 105.600 euro erabiliz. Itxasok lan hauen helburua espezieei enbarazurik eragin gabe bide horretaz disfrutatzea dela adierazi du. “Bide horiek lotu gabe daude elkarren artean eta, gainera, eremu babestuak zeharkatzen dituzte, bere ingurumen-hobetzea eragotziz”.
Ibilbide zirkularra osatzeaz gain, hezeguneak babestuko dituztela azaldu du Barredok,”biodibertsitatea berreskuratzen lagunduz”. Horrez gain, dagoeneko aurkeztu dituzten San Lorentzo aintzira handitzea eta Pierre Lotitik pasako den bide berriak egingo direla baieztatu du sailburuordeak. Sagarzazuk gaineratu du Txingudiko Planaren barruko “hobekuntza proiektu” bat dela, ekosistema berreskuratzeko eta hobetzeko.
Lanak hobe ulertzeko mapak aurkeztu dituzte.
Obra
Osotara oinezkoentzako kilometro bat egingo dute, eta bukaera bi eremutan egongo da: Zaldiferra inguruan eta Bekoerrotaren bueltan. Bekoerrotan, padura zeharkatzen duen bidexka kenduko dute eta goitik, mendi bidetik jarraituko du, berriz dagoeneko badagoen biderantz edo beste modu batera azalduta, kenduko duten bidexka amaitzen zen tokiraino. N-638 errepidearekiko paraleloa den bidegorria probestuz osatuko litzateke ibilbide zirkularra.
Zaldiferran lanak egiten dabiltza egun, eta oinezkoentzako pasabidea jarriko dute. Era berean, N-638ko bidegorriarekin lotura egingo da. Era honetan, padurak erditik zeharkatu gabe bide zirkularra osatu ahalko da.
Lanek iraun bitartean Bekoerrotako jatetxera joateko aldaketak egongo dira, baita inguruko zenbait baserrietara sartzeko ere. Dena den, udalak “behar diren neurriak” hartuko dituztela adierazi du.
