"Ez dut inoiz ikusi poesia irakurria disko batean, beti abestiak ziren"
Unai Pelayo musikariak eta Jose Mari Zendoiak beraien diziplinak batu dituzte ‘Ezusteko bidaiariak’ errezitaldi musikatua sortzeko. Alde Zaharreko Kultur Etxean izango dira Blaganek gonbidatuta, hilaren 19an, 19:00etan.
Donostiatik at egingo duten lehen errezitaldia da. Nola otu zitzaizuen errezitaldia musikatze hori?
Ideia Unairi bururatu zitzaion, berak proposatu zidan egitea. Donostiako Egia auzoan taberna bat konpondu zuten, eta irekiera ekitaldia izan zenean ikusi genuen bazegoela gauzak egiteko lekua, eta orduan berak esan zidan, ‘egin dezakegu noizbait zer edo zer elkarrekin, zuk zure poesia irakurri eta nik musikarekin lagunduko’. Ideia harena izan zen.
Eta aurrera egin zenuten.
Bai, emanaldiekin hasi ginen, eta geroago Unaik esan zidan guk sortutakoa graba genezakeela estudio batean. Niri oso ideia polita iruditu zitzaidan. Harritu egin nintzen, ez dudalako inoiz ikusi poesia irakurria disko batean, beti liburuetan ikusi dut, edo abestiak dira. Poesia irakurria musikaz lagundua ez nuen ezagutzen. ‘Aitzindariak izango gara, bada, Euskal Herrian’, esan zidan Unaik. Iazko udaran hasi ginen grabaketekin eta irailean bukatu genuen, Donostiako Tolare aldean grabatu genuen Unaik daukan estudioan.
Nola azalduko zenioke irakurleari zuen elkarlana? Zein pisu dauka musikak eta zein hitzek?
Oso iradokitzailea da. Aurrekoan, Loiolan aurkeztu genuenean, jendea gerturatu zitzaigun esatera gustatu zitzaiela eta askok esan ziguten poesia irakurtzea zaila dela, baina musika honekin lagunduta errazagoa egiten zitzaiela. Izan ere, musika lasaia da, poesiarekin bat datorrena, eta entzulearentzat poesia jasotzeko esperientzia errazagoa da dirudienez. Gero Unaik beste bi abesti propio kantatzen ditu, aldatzeagatik. Beharbada bestela astuna izango litzateke saioa.
Ezusteko bidaiariak-en helburuetako bat poesia herritarrengana gerturatzea izan da.
Saiatu izan naiz lana argitaletxeetara bidaltzen eta esan izan didate agenda beteta daukatela, edota beti badagoela beste norbait nire aurretik. Nire testu batzuk Booktegi-n dauzkat, testu digitalen euskal plataforma da. Hau egiten ari ginela liburu bat egitea baino askoz dibertigarriagoa zela beste euskarri honetan egitea iruditu zitzaigun. Niretzat flipantea izan da diskoa grabatzea. Nire ahotsa beste errezitaldietan-eta entzuna nuen, baina irakurri eta nire ahotsa grabatuta entzutea, eta jakinda musika batzuetan dotorea dela, oso gauza ederra zela sentitu nuen.
Aurretik Ezusteko argonautak lanean idatzitakoan oinarritu zara. Nor dira izenburuan jasotako bidaiari horiek?
Hemen munduan bizi garen gizakiak gara ezusteko bidaiariak. Hemen gaude bidaia bat egiten, batzuetan geldirik bagaude ere, gure burua bidaiatzen ari da eta bestela ere munduan gauzak egiten ditugu. Gure existentzia da gure bidaia, ezustekoz betea. Hasieran Ezusteko argonautak zuen izena lanak, eta poesia luze bat zen. Bertan kontatu nuen bi pertsona zebiltzala munduan zehar gauzak topatzen. Handik hartu nuen Ezusteko bidaiariak izango zenaren parte handi bat; ez zen gauza berbera, beraz, izena aldatu nion. Argonautak bidariari greziar mitologikoak dira, eta gaur egunera ekarri nuen haien figura.
