Ekintzaileen Eguna ospatuko dute Irun eta Hondarribiko zentroetan
CIFP Bidasoa, Plaiaundi BHI, Irungo La Salle BHI, Mendibil Prestakuntza Zentroa eta Tknikak parte hartuko dute saio horietan.
Ekintzaileen Eguna Bidasoa Bizirik-ek sustatuta, Ekintzaileen Egunaren harira, hainbat saio egingo dituzte CIFP Bidasoa, Plaiaundi BHI, Irungo La Salle BHI, Mendibil Prestakuntza Zentroa eta Tknika zentroetan.
Saio horien helburua kultura ekintzailea sustatu nahiz ikasleak motibatzea eta ekintzailetzari balioa ematea dela nabarmendu du Miguel Angel Paez Bidasoa Bizirik-eko presidenteak. Besteak beste, negozio berriek gizartean duten eraginari eta balioari buruzko gogoeta egin eta eskualdeko ekintzaileak omendu nahi dituzte iniziatiba horren bidez. Bertan, ikasle ohiek parte hartuko dute, eta beren esperientziaren berri emango dute.
Pandemiak ekintzailetzan izan duen eraginari buruz ere hausnartuko dute; izan ere, negozioak eta ekintzailetzak kudeatu eta garatzeko gaitasun berriak eskuratzea bultzatu baitu. Aldaketetara egokitzeko produktibitatea, berrikuntza eta sormena areagotzen lagundu duela nabarmendu du garapen agentziak, baita zenbait aldaketa bizkortu ere, batik bat, digitalizazioarekin lotuta. 2030 Agendan eta jasangarritasunean ere eragin duela gaineratu du Bidasoa Bizirik-ek.
200 ikasletik gora
Bidasoa Bizirik-en arabera, urtean zehar ere ekintzailetza sustatzeko hainbat jarduera egin dituzte. Hala, ekintzailetza sustatzeko programan goi-mailako zikloetako lehen mailako 200dik gora ikaslek parte hartu dute, eta balorazio positiboa egin dute. “Ikasleek beren espezialitatean eskuratzen duten prestakuntza akademikoarekin batera gara ditzaketen trebetasunak nola erabili ikasi behar dute”, azaldu du.
