Larunbatean, Bidasoaren 700. partida Asobal Ligan
Espainiako Eskubaloiko Lehen Mailak Asobal Liga izena duenetik, 699 partida jokatu ditu bertan Bidasoak. Larunbatean da 700.ena.
Azken aldiz 2016an lortu zuen Asobalera igoera Bidasoak. Bi arlotatik begiratuta partida oso garrantzitsua du larunbatean Artalekun Bidasoa eskubaloi taldeak (18:30ean hasiko da). Batetik, Asobal Ligako bigarren postua izango du jokoan aurrez aurre izango duen Granollersen kontra. Bestetik, datu historikoa: Asobal Ligan (Espainiako Lehen Mailak izen hori duenetik, 1990etik alegia) irundarrek jokatuko duten 700. partida izango da. Espainiako Lehen Mailan askoz partida gehiago jokatutakoa da 1990 aurretik Bidasoa, baina eskubaloi taldeen elkarteak liga antolatzeari ekin zionetik, 700. partida izango dute horiek larunbatekoa. Egun berezia izanik, klubak hainbat jarduera antolatu ditu.
Asobal Liga izenarekin, sei taldek eraman dute ligaren garaipena zakura. Existitzen direnen artean, Bidasoa bera, Bartzelona eta Ademar-Leon daude. Ciudad Real, San Antonio eta BM Cantabria ere izan ziren txapeldun, baina talde horiek desagertu egin ziren. Irundarrek 1994/1995 sasoian irabazi zuten Asobal Liga; 1986/1987koa ere irabazi zuten, baina ligak ez zuen oraindik Asobal izena. Izen horretako ligan debuta 1990eko urriaren 3an izan zen irundarrentzat, Tenerifeko Tres de Mayo taldearen kantxan (21-27 irabazi); aurretik hasi zen liga, baina Europako partidengatik eta hasiera atzeratu zelako, hori izan zen irundarren lehena. Taldeak hainbat datu eman ditu, honakoak esanguratsuenak:
- Asobalen denetik (24 denboraldi gutira) jokatutako 699 partidetatik 337 irabazi ditu Bidasoak, 78 berdindu eta 284 galdu. Asobaleko liga guztien sailkapen historikoan, bosgarren da Irungo taldea partiden kopuruan, desagertu zen BM Valladolidetik bi partidara. Orotara, 772 puntu lortu ditu taldeak.
- Asobalen denetik, 17.824 gol egin dituzte irundarrek, eta 17.611 jaso.
- Asobalen, partida gehien Bartzelona eta Granollers taldeen kontra jokatu dituzte, 54 norgehiagoka. Orotara, 51 talde ezberdinen kontra aritu da 1990etik Bidasoa Asobalen.
- Honakoak izan dira Bidasoak Asobalen izan dituen entrenatzaileak: Juantxo Villarreak, Ivan Sopalovic, Mario Hernandez, Jordi Ribera, Julian Ruiz, Aitor Etxaburu, Fernando Bolea eta Jacobo Cuetara.
- Aldeko gol gehien egindako partida: Bidasoa-Teucro, 40-20. 1996/1997 sasoian.
- Gol gehien jasotako partida: Bartzelona Bidasoa, 48-27. 2013/2014 sasoian.
