[Bideoa] Migrante baten bila ari dira Bidasoa ibaian
Segurtasun Sailak jakinarazi duenez, ustez apirilaren 18an desagertu zen Endarlatsa inguruan, mendi magaletik erori ondoren.
Larrialdi Zerbitzuen dispositibo bat martxan jarri dute gaur goizean ustez apirilaren 18an desagertutako migrante gazte bat aurkitzeko. Segurtasun Sailaren arabera, Endarlatsa inguruan izan zen ezbeharra gaztea mendi magaletik erorita. Desagertutako pertsona beste bi lagunekin zegoen gune malkartsu batetik Irundik Hendaiara igaro nahian.
Eusko Jaurlaritzako Larrialdi Zerbitzuen Arretako teknikari bat ari da operatiboa zuzentzen, eta Ertzaintzaren Zaintza eta Erreskateko Uretako Alorra dago barruan, baita Hondarribiko Gurutze Gorriko baliabideak ere. Ertzaintzak Gipuzkoa eta Nafarroa lurraldeen arteko muga arakatuko du uretatik, eta Gurutze Gorria Bidasoaren bokalea eta Faisaien irla, Segurtasun Sailak jakinarazi duenez.
Migranteekin lan egiten duen gobernuz kanpoko erakunde batek ohartarazi zion atzo Ertzaintzari pertsona bat desagertu zela.
Bidasoa ibaian lau migrante hil dira dagoeneko. Joan den hilean izan zen azken heriotza, martxoaren 30ean gorpu bat aurkitu ondoren. Baieztapen ofizialik izan zen arren, hilotza zantzu guztien arabera, martxoaren 12 desagertu zen Ibrahin Diallo gazte senegaldarrena zen.
