Santiagotarrak-BM taldeak emaitza onak lortu ditu asteburuan
Aizpea Gonzalezek eta Naroa Zubimendik Espainiako selekzioarekin estropada internazionalak prestatzen jarraitzeko aukera izaten jarraituko dute asteburuko emaitzei esker.
Naroa Zubimendi eta Aizpea Gonzalez arraunlariak Bañolasen. Aulki mugikorra
Asteburu honetan (hilak 8,9 eta 10) Santiagotarrak-BM taldeko 6 kirolarik Bañolaseko Udaberriko Open Estropadan parte hartu zuten, aulki mugikorreko modalitatean. Estropada horrek Espainiako selekzioaren parte izateko balio zuen, eta hori zen hain zuzen ere, Santiagotarrakeko kirolariek zuten helburuetako bat.
Aizpea Gonzalezek eta Naroa Zubimendik Espainiako Selekzioak eskatutako emaitza minimoak bete eta estropada internazionalak prestatzen jarraitzeko aukera izaten jarraituko dute, biak ala biak. Halaber, bertaratutako gainontzeko taldekideek ez zuten eskatutako emaitza minimo horiek betetzea lortu.
Bestalde, apirilaren 10ean, Gipuzkoako aulki mugikorreko ligaren 4.estropada egin zen Legutiano lakuan eta Santiagotarrak-BM klubeko 45 arraunlarik parte hartu zuten bertan. Emaitza onak lortu zituzten Arabako lakuan, izan ere, Asier Regueirok (skiff, absolutu kategoria), Jone Laguardiak eta Elaia Saenzek (scull bikoitza, kadete kategoria), Ainhoa Zapiainek (skiff, absolutu kategoria), Ander Ibargoieek eta Alex Condek (scull bikoitza, jubenil kategoria) Elaia Saenzek (skiff, kadete kategoria), Ander Ibargoienek (skiff, jubenil kategoria) eta Jone Laguardiak, Leire Navaridasek, Maria Martinezek eta Maialen Bengoetxeak ( 4 scull, kadete kategoria) urrezko domina eskuratu zuten.
Ur-biziak
Seu d´Urgelleko kanal olinpikoan Muturreko Eslaloneko Estatuko Kopako lehenengo proba egin zen pasa den asteburuan eta Santiagotarrak-BM taldeko 9 kirolari izan ziren bertan.
Santiagotarrak Elkarteko Ur Bizien taldeak taldekako hirugarren postua eskuratu zuen. Halaber, Klara Olazabalek zilarrezko domina lortu zuen K1 senior kategorian.
Modalitate hau ez da oso ezaguna, baina Paris 2024ean kirol olinpikoa izango dela erabaki zenetik “gero eta garrantzi gehiago” hartzen ari dela adierazi zuen Santiagotar Elkarteko Ur bizien taldeak.
