'Mendiak-1976' filma ikusgai, asteburuko Mendi Tourren
Mendiko, abenturazko, muturreko kiroletako eta naturekin lotutako pelikulek osatuko dute Mendi Tour zirkuitua. Sarrerak jada lor daitezke ohiko bideetan.
Asteburu honetan Mendi Film nazioarteko jaialdiko pelikula onenen Mendi Tour zirkuitu ibiltaria iritsiko da Itsas Etxera. Mendiko zinemarik onenarekin gozatzeko aukera dela azaldu du Hondarribiko Udalak. Babesle nagusia udala da, eta laguntzaile izan ditu Zineuskadi eta madrilgo Instituto Polaco de Cultura.
“Ikaragarrizko kalitatea duten emanaldiak dira, eta hiritarrak eta gure artera etortzen direnak deitu nahi nituzke ikuskizunaz gozatzera” adierazi du Juan Luis Silanes Kultura zinegotziak. Programazioa mendiko, abenturazko, muturreko kiroletako eta naturako pelikulek osatuko dutela eman du aditzera.
Zinema festibalean sarituak izan diren lau proiektatuko dituzte, horien artean, Mendiak-1976. Publikoaren Saria eta Mendiko Film Onenaren saria irabazi zituen, eta Iruñeko eta Baionako zinemetan 7 astez egon da, 4.200 ikusle izan dituelarik. “Mendi Tour zirkuituko emanaldietan ikusleen harrera bikaina jasotzen ari da” dio udal ordezkariak.
Lan euskaldunekin jarraituz, Mikel Sarasolaren Jötunn ikusteko aukera izango da ere. Horrez gain, The Traverse filma pantailaratuko dute, baita Black Ice ere.
Emanaldi guztiak 19:00etan hasi eta 21:00etan bukatuko dira. Azpititulatutako jatorrizko bertsioetan eskainiko dira ikus-entzunezkoak eta bakoitzerako sarrerak 3 euro balio dute; Arma Plazako leihatilan edo Kutxabanken eros daitezke.
