10 kilometroko lasterketen liga Irunen aurkeztu dute
Bost lasterketako herrialdeko liga da, eta horietatik bi Bidasoan egingo dituzte: Hondarribiko 10K, eta Txingudi Korrika.
Irungo Decathlon saltokian aurkeztu zuten ostiralean Ekiphos 10k Gipuzkoa Liga. Herrialdean egiten diren hamar kilometroko bost herri lasterketak osatuko dute egutegia, eta horietatik bat jada egina dago. Oarso Bidasoan ligako horretako bi egingo dituzte: maiatzaren 28an Hondarribiko 10K lasterketa, eta urriaren lehenean Txingudi Korrika. Bi horiez gain, jada egina dagoen Donostiako Udaberriko Lasterketa, irailaren 25eko Joxetxo Imaz Memoriala (Lazkao-Ordizia-Beasain) eta 3 Hondartzetako Krosa (Donostian, urriaren 9an) dira ligaren barruko lasterketak. Proba horien antolatzaileak ere izan ziren ostiraleko agerraldian.
Egitasmoaren sustatzailea Iker Velasco irundarra da, Ekiphos egitasmoaren sortzaile eta burua. Hark aurkezpenean azaldu zuenez, ligaren oinarrian dago herritarrek kirola egitea, eta horretarako herri lasterketen egutegian dauden hainbat lasterketa baliatuko dituzte. Aldi berean, ligarekin proba horiei “balio handiagoa” emango dietela azaldu du.
Ligan bost proba horietan izena ematen dutenek parte hartuko dute. Hala, gero eta proba gehiagotan parte hartu, ligarako puntu gehiago lortuko dituzte korrikalariek. Egitasmoaren webgunean ikus daitezke oinarri zehatzak, eta puntuazio irizpideak. Liga bukatzean, bukaera ekitaldia egingo dute: bost lasterketak egin dituztenek domina berezia jasoko dute, eta aldi berean kategoria bakoitzeko hiru lehenek sariak izango dituzte. Emakumeentzat nahiz gizonentzat puntuazio sistema bereiziak prestatu dituzte.
Argazki lehiaketa
Ekiphos, besteak beste, argazkien plataforma da, Iker Velasco irundarrak sortua. Han, beste askoren artean, herri lasterketetako argazkiak ikus daitezke. Bada filosofia horri jarraiki, argazki lehiaketa antolatu dute 10 kilometroko lasterketa horiekin paraleloan. Hala, lasterketa bakoitzeko hiru argazki onenak aukeratuko dira, horiek 10K Ligako webgunean argitaratu, eta bukaerako ekitaldian onen diren horien artetan hiru irabazleak izendatuko dituzte.
