Hiriko emakumeekin batera landuko dute V. Berdintasun Plana
Emakundek zehaztutako jarraibideez harago, 2022-2026rako plan hau "ahalik eta osatuena" izan dadila nahi du udalak, eta horretarako, partaidetza prozesu bat abiatuko dute.
V. Berdintasun Plana lantzen ari da dagoeneko Irungo Udala, honen gaineko nondik norakoak aurkeztu ditu gaur Miren Etxebeste ordezkariak. Nabarmendu duenez, bosgarren honek ere “emakumeen eta gizonen arteko berdintasunaren egungo egoerari buruz hausnartzea” izango du helburu, “alor horretako beharrak, arazoak, aukerak eta erronkak identifikatzeko”.
“Berdintasunean aurrera egin ahal izateko, gure errealitatearen araberako plan bat behar dugu, eta bertan neurri espezifikoak jaso beharko dira, Irunen aukera-berdintasuna, askatasunak eta eskubideak errespeta daitezen, guztionak eta guztiontzat”, esan du ordezkariak. Emakundek zehaztutako jarraibideez harago, 2022-2026rako plan hau “ahalik eta osatuena” izan dadila nahi du udalak, eta horretarako, partaidetza prozesu bat abiatuko dute.
Plana idazteko prozesuak hamar hilabeteko iraupena izango du (urtarrilean hasi zen, beraz, urrian amaitzea aurreikusi dute). Bost gune diseinatuko dituzte parte hartzeko: udal teknikariak; Irungo emakumeak, emakumeen elkarteak eta elkarte feministak; indarkeria sexista; diskriminazio anizkoitza; eta beste erakunde eta jarduera batzuetan lan egiten duten eragile feministak.
